Champion lai Dortmund-in St Pauli an hneh lo
DFB-Pokal-ah champion lai Borussia Dortmund-in 2. Bundesliga club St Pauli 2-1 in last 16-ah an hneh lo a, an tla. German Cup-ah hian record nei ṭha ber Bayern Munich chu second round-ah an tla tawh a, club tenau zawk tan champion-na kawng a inhawng zau ta hle.
Inkhel dangah FC Cologne leh Hamburger SV te hun pangngaiah 1-1 a an inhnehtawk hnuin penalty shootout-ah Hamburger 4-3 in an chak a, 1860 Munich leh VfL Bochum ten quarterfinal lut turin Karlsruher leh Mainz te 1-0 leh 3-1 in an hneh ve bawk.
Dortmund an tla
Marco Rose-a'n vanduai theih tih hriain player ṭhate a khelhtir a, German second division club hmachhawn turin tlarhmaah Erling Haaland, Marco Reus leh Thorgan Hazard ten bul an ṭan.
Amaherawhchu Millerntor-Stadion-ah mualneitu St Pauli-in bul an ṭan ṭha a, minute lina lekah dinglam aṭanga Marcel Hartel cross chu Etienne Ameyido-a'n a khung nghal.
Dortmund-in first half-ah Marco Reus hmangin siphurh sutna remchang an nei a, Dortmund captain hian tlarhnung aṭanga long ball vawrhchhuah chu box chhungah ṭha takin la thla mah se keeper Dennis Smarsch-a'n a goal khung tur a dansak.
St Pauli bawkin first half-ah goal an khung a, minute 40-naah Dortmund tlarhnung an ṭhiat a, dinglam aṭanga Etienne Ameyido cross chu Axel Witsel-a'n an lamah a tilut.
Second half-ah pawh St Pauli-in chance ṭha an nei hmasa zawk a, mahse Dortmund an vannei zawk. St Pauli defender handball vangin minute 58-naah penalty an hmu a, Haaland-a'n goal-ah a chantir.
Dortmund-in siphurh sunna tur hun an ngah a, an goal bawh pawh a na. Mahse goal hmaah Dortmund an hriam tawk lo a, substitute Donyell Malen-a'n a hun ṭha neih goal zawnah a pet lo. St Pauli-in 2-1 in hnehna an chang.
Engtin zel?
St Pauli-in an kum 16 hnuah DFB Pokal quarterfinal an lut a, he round thleng tur hian champion lai Dortmund an hneh avangin inrintawkna an ngah sawt ang.
Quaterfinal lut tawh club pali zinga pathum St Pauli, Hamburger SV leh Karlsruher SC te hi 2. Bundesliga club an ni. Bundesliga club awmchhun VfL Bochum pawh hi season liam ta khan 2. Bundesliga an la khel a, an ropui bik lo.
Nizan lama inkhelah erawh nikum finalist RB Leipzig bakah Bayern hnehtu Borussia Monchengladbach leh Mizorama rawn zin tawh 1899 Hoffenheim te an la tel a, champion erawh la harsa dawn.
Quarterfinal draw hi January 23-ah neih a ni dawn a, inelna hi March 1-2, 2022-ah khelh leh a ni ang.
January 18, Thawhlehni
FC Cologne 1 - 1 Hamburger SV
Penalty Shootout-ah Hamburger 4-3 in an chak
COL : Anthony Modeste 120+2'
HAM : Robert Glatzel 92'
1860 Munich 1 - 0 Karlsruher
KAL : Marvin Wanitzek 69' (P)
VfL Bochum 3 - 1 Mainz
BOC : Milos Pantovic 56' (P), 59'; Eduard Lowen 80'
MAI : Karim Onisiwo 36'
FC Saint Pauli 2 - 1 Borussia Dortmund
SAI : Etienne Ameyido 4'; Axel Witsel 40' (OG)
DOR : Erling Haaland 58' (P)