Golden State chak ve leh ta

Tun hnaia che fuh hleithei lo Golden State Warriors pawhin chak ni hmel an hmu ve leh ta. Nimin zing NBA regular season inkhelah Golden State hian Detroit Pistons chu 102-86 in an hneh a, an chak loh kaltluang lai an titawp.

Golden State hian result ṭha an neih loh rei avangin Western Conference hmahruaitu an nihna pawh an hloh hman. Pistons lakah Klay Thompson-a'n point 21 neiin point a nei hnem ber, a hliam a dam leh tawh tih a nemnghet nawn.

Klay-a bakah Stephen Curry (18 points) leh Andrew Wiggins (19) te an che ṭha a, point 12 neitu Jonathan Kuminga a awm bawk avangin harsatna an tawk lo; quarter hmasa pahnihah an san fal avangin a hnuhnungah hniam zawk mah se an buai phah tawh lo a ni.

GSW hi match 32 an chak tling ta chiah a, an chunga awm leh hmahruaitu ni bawk Phoenix Suns aiin match hnihin an chak tlem zawk. Steve Kerr-a naute hian Zirtawpni zingah Indiana Pacers an hmachhawn leh ang.

NBA - Nimin Results
Minnesota Timberwolves 112 - 110 New York Knicks
Detroit Pistons 86 - 102 Golden State Warriors