Real legend 'Paco' Gento a thi

Spanish Super Cup nomawi chawi hlim Real Madrid-in chanchin lawmawm lo an nei a, club legend Francisco 'Paco' Gento chu kum 88 mi niin a thi a, Real honorary president hi European Cup-a vawi ruk champion thei awmchhun player a ni.

Gento hian 1953-71 inkar khan Real tan a khel a, inelna hrang hrangah match 600 khelin goal 182 a khungsak a, league nomawi vawi 12 an chawi bakah Copa del Rey (2) leh Intercontinental Cup (1) ah a champion pui bawk.

Racing Santander aṭanga a career ṭantu Gento hian Real tan nomawi 23 a chawi hman a, Real tana champion hnem ber record kum 50 chuang zet a chelh chu kar hmasa khan Marcelo chuan Spanish Super Cup nomawi chawiin a rawn nihrual a ni.

Spain tana vawi 43 inlan a, 1962 leh 1966-a World Cup khel thei Outside left (winger) hi Real chuan an ui thu thuchhuah siamin an thlah a, "A kalsan tak a nupui fanau, tu leh fate leh a hmangaih zawng zawngte kan tawrhpui takzet a, Madridistas mai ni lo, football fan-ten khaw­vela footballer ṭha ber pawl angin an hre reng ang," an ti a, an legend an thlah mawi hle.