AFCON: Goal khung lo Senegal an tlang

Africa Cup of Nations group stage-a an match hnuhnung berah Senegal-in 0-0 in Malawi an inhnehtawkpui a, group B-a hmahruaitu ni chungin last 16 an lut.

Group B inkhel dangah beisei tur nei tawh lo Zimbabwe-in 2-1 in Guinea an hneh a, Liverpool midfielder Naby Keita hoa khel Guinea hi tlawm mah se last 16 an lut tho.

Zimbabwe tan Knowledge Musona leh Kudakwashe Mahachi te chuan goal khat ve ve an khung a, Guineatana Keita si phurh sutna goal-in awmzia a nei phak lo.

Group B aṭangin Senegal leh Guinea chu a thiam 16 zingah an tel chiang ta a, Malawi tan midang result ngaihchan tel a ngai ta thung.

Beisei phak lo
Senegal-in Malawi lakah goal an khung lo leh ta a, group B match thum an khelh tawhah goal khat chiah an khung - an goal khung awmchhun hi penalty aṭanga Zimbabwe laka an khung a ni!

Liverpool forward Sadio Mane telna Senegal hian champion an beisei dawn a nih chuan tlarhma lamah insiamṭhat an mamawh tih a lang a, last 16 chinah chuan a danglam tawh dawn.

Ligue 1 club Strasbourg forward Habib Diallo leh Mane ten goal khungna remchang nei ve ve mah se an hun ṭha neih an chhawr thei lo a, goal khung an harsat chhunzawm.

Malawi-in Senegal wing back Bouna Sarr-a'n Gomezgani Chirwa a tih tluk avangin penalty an hmu emaw an ti hman a, mahse, referee-in video assistant referee a rawn hnuah a sut a, an vanduai - Malawi tan pathumna ti ṭha pali zinga tel chunga last 16 luh chu beiseina tur a ni ang.

Tlawm mah se...
Zimbabwe-in AFCON-ah beisei tur nei tawh lo mah se hmingchhe taka Africa khawmualpui inelna mangṭha an duh lo a, team ṭha Guinea lakah 2-0 in hma an hruai hman hial.

Saudi club Al-Tai winger Knowledge Musona chuan minute 26-na lekah Guinea barakhaihin goal hmahruai a khung a, tah hian an duhtawk mai lo.

South African club SuperSport United midfielder Kudakwashe Mahachi chuan minute 43-naah Zimbabwe tan goal hnihna a rawn khung ve leh a, awlsam takin an chak dawn niin a lang.

Arsenal forward hlui Kaba Diawara enkawlna hnuaia khel Guinea-in mipui ṭanpuina nen theihtawp an chhuah a, Keita goal mawi hmangin si phurh an sut ṭhen. Guinea captain hian mual ding lam aṭanga ball a lakluh hnuah a ke vei lam hmangin class zetin a pet a, goalkeeper tan dan chi a ni lo.

Zan chhinchhiahtlak
Guinea-in goal an khung hnuah an nawr na zual sawt a, mahse, an vanneih zan a ni lo - kum 2006 hnua a vawi khat nan AFCON-ah Zimbabwe an chak a, group stage erawh an paltlang zo ta chuang lo.

Beisei aiin Zimbabwe leh Guinea inkhel a hmuhnawm a, inkhel zawhah sawi zui hlawh tak pakhat erawh inkhel enkawltu referee Salima Mukansanga a ni.

Kum 35 mi hmeichhe referee hi AFCON-a hmeichhe referee ni thei hmasa ber a ni a, he inkhelah hian yellow card vawi ruk a phawrh - nikum Olympic-ah referee a lo nih tawh avangin a talbuai lo hle.

AFCON-ah hian hmeichhe match official pali an awm a, mahse, match enkawltu ber referee hna thawk erawh Mukansanga chiah hi a la ni a, Nations Cup thawnthu thar ziahin a awm.