Champion lai Juventus an chak

Italian Cup champion lai Juventus chuan Sampdoria 4-1 a hneh­in quarterfinal an lut a, season kal laiah Old Lady tan Coppa Italia hi nomawi beisei theih san ber a ni tawh, champion ngei pawh an tum dawn.

Thawhlehni zan last 16 inkhelah Juve tan Juan Cuadrado, Daniele Rugani, Paulo Dybala leh Alvaro Morata ten goal khat ṭheuh an khung a, mikhual tana Andrea Conti goal khungin awmzia a nei phak lo.

Massimiliano Allegri naute hian quarterfinal-ah chuan Sassuolo leh Cagliari inkhela chak zawk an hmachhawn leh ang, team pahnih hi nizan khan an intawng a, result erawh kan hre hman lo.

Juventus enkawltu assis­tant manager Marco Landucci chuan, "Hripui lengin min la tibuai zel a, stadium khat tlata mipui an awm theih loh hi chuan a khawhar thlak deuh ṭhin. Chuti chung chuan ṭha taka kan khelh theih avangin a lawmawm.

"Player zawng zawng an khel ṭha, a bik takin tun hnaia Paulo khelh danin min tilawm, a hma hun pawh a fel thuai ang. Hliam damhlim Danilo a inkhel leh thei tawh bawk a, kan indaih lohna zualpui a phuhru ngei ang," tiin a sawi.

Inkhel dangah Lazio an tlang bawk. Tlang tur erawhin vanneihna an mahmawh tel, extra time khelh a nih hnuah Udinese chu 1-0 in an hneh hram; goal awmchhun hi substitute Ciro Immobile-a'n minute 106-naa a khung a ni.

Napoli manager Maurizio Sarri chuan, "Ka nauten hma an sawn zel, kei leh player tan chuan fiahna ṭha tak a ni. Ball possession 66% zet nei chunga goal khung kan harsat tlat kha a mak a, chutihrualin hun pawimawh bika goal khung thei player neih hlutna a lang," tiin a sawi.