Chelsea nomawi beiseina a thamral zel

Chelsea-in Thawhlehni zan khan Brighton & Hove Albion lakah point khat chauh an hlawh chhuak a, Thomas Tuchel-a hote hian Manchester City aia match khata an khel tam chungin point 12 zetin Pep Guardiola hote an pha tawh lo. London club tan tun season Premier League champion a har tawh ang.

Amex Stadium-a inkhelah hian Hakim Ziyech hmangin Chelsea-in hun chanve hmalamah khung hmasa mah se Seagulls-in Adam Webster hmangin second half-ah an sut a, 1-1 in inkhel a tawp. Chelsea hian January 23, Pathianni zan dar 10:00-ah Tottenham Hotspur an mikhual ang.

Ziyech goal
Chelsea-in bul an ṭan ṭha lo a, Brighton lakah inkhel an thunun thei lo. Seagulls-in chance ṭha an nei hmasa zawk a, Polish striker Jakub Moder-a'n a chance ṭha neih chu goal pawnah chiah a pet.

Blues-in chance ṭha bik an insiam thei lo a, minute 28-naah Hakim Ziyech-a'n box pawn aṭangin ṭha zetin a pet goal. Ziyech-a'n tun season Premier League-a goal hnih a khungna a ni a, season liam taah pawh goal hnih tho a khung. Moroccan winger hian Ajax aṭanga Blues a zawm hnuah beisei a pha lo.

Chelsea-in hmahruai belh theihna hun ṭha an nei a, Romelu Lukaku ball pek chu Callum Hudson Odoi-a'n a pet over a, first half-ah 1-0 chauhin hma an hruai.

Seagulls tan Webster
Second half-ah Brighton-in bul an ṭan ṭha zawk a, Pascal Gross-a ball pek chu Danny Welbeck-a'n goal zawnah a pet thei lo. Alexis Mac Allister erawhin goal-ah a pet mah se keeper Kepa Arrizabalaga-a'n a dansak.

Minute 60-naah Brighton-in an phu ang ngeiin siphurh an sut a, Mac Allister-a corner pet chu vengtu nei lo Adam Webster-a'n a tauh lut. Chelsea player-te an inring thulah a ngaih theih a, Webster-a'n zalen taka a tauh theih chhana mawhphurtuah Mason Mount a mawhpuh theih.

Chelsea-in chak tura goal an mamawh chungin Brighton tlarhnung an ti nghing pha lo a, 1-1 in inkhel a tawp. Seagulls hian December 26 khan Stamford Bridge-ah point khat an hlawh chhuak tawh a, an muala Chelsea an chelh leh thei hi result ṭha a ni.

Beiseina a bo
Chelsea-in season bul an ṭan ṭha a, tunah erawh chak an harsat tawh. Tuchel-a hote hi an league match hnuhnung 11-ah vawi thum chauh an chak a, ṭum hnih chak loin ṭum ruk dangah an inhnehtawk.

Season tir lama champion inbeisei Chelsea tan nomawi chawi a harsa tawh dawn a, season thara Champions League khel pha tur pawhin rang taka insiamṭhat a ṭul dawn. German manager Tuchel chuan, "Knockout match ang mai a ni a, inkhelh a harsa. Referee-in hun tawp hamrik a ham chiah khan chak ang maiin mipui thawm a ṭha. Mahse chak lo kan ni lo, team dang pawhin helai hmunah hian chak an harsat ang," tiin a sawi.

Chelsea manager Tuchel chuan sawi chhunzawmin, "Tunah chuan kan inkhelh leh hmain ni li kan chawl dawn a, a lawmawm. Ni sarih chhunga vawi thum inkhelh te kan nei. Kan inkhel chauh a ni lo a, zin chhuah a ngai a, kan mu tam thei lo. Chuvangin kan inkhelah pawh kan chau tih a hriat a, kan pawm thiam erawh a ṭul," tiin hahdam an mamamawh thu a sawi.

January 18, Thawhlehni zan

Brighton 1 - 1 Chelsea

BRI : Adam Webster 60'

CHE : Hakim Ziyech 28'