Daniel-a'n goal a khung; Danmawia a vanduai
Thawhlehni zan Indian Super League inkhelah Daniel Lalhlimpuia'n goal a khung a, Odisha FC chu NorthEast United lakah 2-0 in hnehna a chanpui - coach Kiko Ramirez an ban hnua an match hmasa berah Odisha an chak nghal.
Serchhip striker hian ISL-ah rei tak goal khung tawh lo mah se goal khung dan a lo la theihnghilh bik lo tih a pholang a, minute 17-naah goal hmahruai a khung.
Daniel-a goal khung aṭanga minute nga hnu lawkah Aridai Cabrera chuan goal khat a khung ve leh bawk a, Highlander lamin a chhanletna tur an neih loh avangin 2-0 in an tlawm.
Mizo tlangval Daniel-a'n goal a khung laiin NorthEast United forward R. Laldanmawia tan erawh vanduai zan a ni - Sialhawk Express goal khung hi offside vanga pawm a ni lo a, mahse, assistant referee-in a phar sual tih a lang.
Daniel-a chuan, "Rei tak goal ka khung loh hnua ka khung avangin ka lawm a, season duhawm tak ka hman chhunzawm ka beisei. Season dang ang lo takin tun season-ah hmun ka chang tam lutuk lo a, ka chance neih ka chhawr thei hi ka lawm khawp mai," tiin Vanglaini a hrilh.
Highlander tan Lalkhawpuimawia'n inkhel bul a ṭan a, a vanneih zan ni se goal khung thei a ni. Odisha tan Daniel-a bakah Lalhrezuala Sailung, Isaac Vanmalsawma leh Jerry Mawihmingthanga ten inkhel bul an ṭan a, Paul Ramfangzauva chu bench aṭangin a lut bawk.
January 18, Thawhlehni zan
NorthEast United 0 - 2 Odisha FC
ODI: Daniel Lalhlimpuia 17'; Aridai Cabrera 22'
Zanin inkhel tur
Kerala Blasters 7:30 PM ATK Mohun Bagan