Arsenal khelmualah final beisei Liverpool

League Cup semifinal first leg-ah Arsenal leh Liverpool te goal khung loin an inhnehtawk a, zanin dar 1:15-ah second leg khel turin Arsenal chuan Liverpool an mikhual dawn.

Anfield-a goal khung thei lo Liverpool tan khualmuala goal khung a awlsam lo ang tih a chiang a, chutihrual chuan hliam, Covid-19 leh AFCON-in Arsenal a tibuai a, kim bik lo mah se Liverpool tan tun hi Gunners hmachhawnna tura hun duhawm a ni.

Thuthang leng velah chuan Arsenal hian Liverpool hmachhawn tur khawp squad an nei lo mai thei tih a ni a, mahse, he thu buatsaih a nih thleng hian inkhel tur hi ṭhulh a la ni lo.

An ngai lo
Liverpool-in AFCON vangin Sadio Mane, Mohamed Salah leh Naby Keita an chhawr thei lo a, Brentford nen an inkhelh ṭumin Salah leh Mane tel loin an goal nawr a na tawk lo angin a lang - mahse, goal thum an khung tho.

Zaninah pawh tlarhmaa intlar turin Takumi Minamino, Diogo Jota leh Roberto Firmino an awm dawn a, anni pathum pawh hi Gunners dam kim lo tan ven tham an ni dawn tih a chiang.

Kum 27 mi Minamino hian League Cup-a match li a khelh aṭanga goal li khungin assist vawi khat a nei a, ngaihthah chi a ni lo. Jota hian tun season-ah match 26 aṭangin goal 12 a khung tawh a, Firmino-a'n match 18 aṭangin goal sarih leh assist pali a nei bawk.

Inlan tur
Divock Origi-a'n club training zawm leh tawh mah se inkhel bul ṭan tur khawpin a la dam chiang lo mai thei. Hliam vangin Thiago Alcantara, Harvey Elliott leh Nat Phillips an inlan thei dawn lo bawk.

Jurgen Klopp-a'n tlarhnunga tlar turin Alisson, Trent Alexander-Arnold, Joel Matip, Virgil van Dijk leh Andy Robertson a la nei a, Jordan Henderson, Fabinho, Curtis Jones/James Milner te midfield-ah an la awm thei.

Defender Ibrahima Konate, Joe Gomez leh Kostas Tsimikas te pawh an dam ṭha vek a, Klopp-a'n duhthlan tur a ngah avangin Arsenal lakah a hlauthawng lo ang.

Arsenal dinhmun
Gunners-in hliam tenau vangin Bukayo Saka, Emile Smith Rowe, Kieran Tierney, Takehiro Tomiyasu, Cedric Soares leh Calum Chambers te an chân a, mahse, Soares tih loh zawng chu zanina inlan thei tura ngaih an ni.

Arsenal hian loan-a tirhchhuah midfielder Miguel Azeez (Portsmouth) leh forward Tyreece John-Jules (Blackpool) te pawh loan-a an kaltirna aṭangin an ko kir a, hei hian Gunners dinhmun a hrilhfiah hle.

Nicolas Pepe, Thomas Partey leh Mohamed Elneny te chu AFCON khelh avangin an chhawr thei dawn lo bawk a, an dinhmun a ṭha lo.

Tu nge inlan ang?
Arsenal tan Albert Sambi Lokonga chu central midfielder chhawr theih awmchhun a ni a, chuti a nih chuan Ben White-a'n defensive midfielder hna thawkin tlarhnung laiah Rob Holding leh Gabriel Magalhaes an inkawp a ṭul ang.

Hetihlai hian Martin Odegaard chu a inkhel tlak tawh anga sawi a ni a, tlarhmaah Alexandre Lacazette, Eddie Nketiah leh Gabriel Martinelli te ho a pui theih chuan Arsenal tan chanchin lawmawm a ni dawn.

AFCON aṭangin Pierre-Emerick Aubameyang chu thawn haw ni mah se dam lohna vang a ni a, a inlan a rinawm chiah lo.