Sania Mirza tan hun hnuhnung

India tennis star Sania Mirza chuan kumin hi a tan infiamna huangah chuan a hun hnuhnung a nih thu a sawi. Season tawp ruala a chawlh tur thu hi Australian Open 2022 aṭanga an tlak hnuah a sawi a ni.

Sania hi kum 35 mi a ni tawh, a vanglai a pelh tawh bakah pasal a nei tawh a, a kum tam lamah hliam a neih fo bawk avangin ngai a awh thei tawh lo. Doubles huanga world number 1 a nih tawh lohna pawh a rei ta hle.

Nimin doubles inkhelah Sania leh a ṭanpui Nadiia Kichenok te chu Kaja Juvan leh Tamara Zidansek te lakah 4-6, 6-7 (5) a chak loin an zinkawng a tawp nghal. India nula tan Australian Open a mangṭha hlenna a ni nghal.

Sania Mirza chuan, "Kumin hi ka tan season hnuhnung ber a ni tawh dawn, kar tin mai hi a indawtin ka chhiar chho tawh dawn. Tennis ka mangṭha nghal vek dawn em, tih erawh ka sawi ngam lo, mahse chawlh chu ka duh," a ti.

Indian hmeichhe player zingah chuan Sania hi a hlawhtling ber a ni. Singles huangah WTA inelna hnuaiah nomawi pakhat a chawi a, doubles lamah chuan title 43 zet a la, a vanglai phei chuan doubles world number 1 pawh a ni reng ṭhin.