India-in Women's Asian Cup a thleng

AFC Women's Asian Cup 2022 chu vawiinah khelh ṭan a ni dawn ta a, tlai dar 3:30-ah China leh Chinese Taipei ten match hmasa ber an khel ang a, zan dar 7:30-ah inelna thlengtu India leh Iran an inkhel leh bawk ang.

Mumbai leh Pune khawpuia neih tur inelnaah hian team 12 an tel a, group pathumah team pali zel awmin ṭhen hran an ni - group tina a sang pahnihin quarterfinal an lut nghal ang a, pathumna zinga a ti ṭha pahnih an lut dawn bawk.

Inelna thlengtu India hi group A-ah China, Chinese Taipei leh Iran te nen an awm ho avangin a thiam pariat zinga tel a awlsam lo ang tih a chiang a, Swedish coach lar Thomas Dennerby tan hna a hautak dawn.

Kum 62 mi coach hian Sweden leh Nigeria hmeichhe team pawh a lo enkawl tawh a, hmeichhe football-a a tawnhriat hi India-in chhawr ṭangkai an tum tur a ni dawn.

India striker chhuanvawr Bala Devi chu squad-ah telh a ni lo a, ram tan match 58 inlana goal 52 khung thei striker hi Scottish club Rangers-ah khel mekin hliam vangin Asian Cup a khel thei lo.

Women's Asian Cup hi Eurosport-ah en theih a ni ang a, online-a en duh tan Jio Tv lamah a en theih dawn bawk.

Zanin Inkhel Tur
China 3:30 PM Chinese Taipei
India 7:30 PM Iran