United Vs Spurs : Fernandes leh Pogba inkawp zan

Zanin dar 12:45 hian Manchester United-in an manager hlui Jose Mourinho enkawl Tottenham Hotspur hmachhawn turin London an tlawh dawn. Mourinho ringawt pawh hi titi tling pha a ni a, chutihrualin Bruno Fernandes leh Paul Pogba te inkawp tur vang ringawt pawhin United ṭantute an men rei phah ang.

Nimin tlai khan press conference neih a ni a, Ole Gunnar Solsjkaer chuan hun rei tak inhliam vanga khel thei lo Paul Pogba leh Marcus Rashford te inkhel tura an inpeih thu a sawi a, Fernandes erawh dam ṭha sa a ni.

Manchester United-in January thlaah Bruno Fernandes an lalut a, Portuguese midfielder hian danglamna a thlen. United game a mawi sawt a, inelna hrang hrangah goal thum khung tawhin mamawh chhanna tih theih a ni.

Solskjaer hote hian match hnuhnung 11-ah hneh loh an tawng tawh lo a, amah­erawhchu an phur vanglai takin Covid-19 vangin inkhel a tawp. United tan vanduaina a ni thei a, chutihrualin Pogba leh Rashford te an dam hman avangin chanchin lawmawm a ni thei bawk.

Kum 25 mi Fernandes chuan, "Season kan khelh chhunzawm leh thei dawn a, mi zawng zawng kan phur. Hun rei tak inhliam hnua Paul rawn let leh tur hian mi zawng zawng a ti phur a, keipawh ka tel. Paul nena khelh dun hi ka châk tawh takzet. Mi tupawhin player ṭha ber nena khelh an duh vek a, Paul hi chutiang zinga mi a ni," tiin Pogba nena inkawp a châk thu a sawi a, an inkawp rem ang em tih hi mipui lam hriat châk a ni thung.

Hriat tel tur erawh friendly match-ah Pogba leh Fernandes an inkawp tawh a, West Brom an hneh lo. Portuguese midfielder chuan, "Player ṭha chu kan kawl a, Mancheser United tana pawimawh ber erawh result a ni," tiin a sawi.

United midfielder an dam kim a, Solskjaer-a chhawr theih turin Pogba, Fernandes, Nemanja Matic, Fred, leh Scott McTominay te an awm. Premier League match hnuhnung bera Manchester City an hneh ṭumin Matic, Fred leh Fernandes ten bul an ṭan a, Spurs nen tu nge inlan dawn hriatthiam a har hle.

Manchester United-in January 23-a Burnley an hneh loh hnuah chak loh an nei tawh lo a, match 11 aṭangin match kuaah an clean sheet a, tlarhnung a khawng ṭha hle.

Manchester City nena inkhelh ṭumin tlarhnungah Victor Lindelof, Harry Maguire leh Luke Shaw te an awm a, mual sirah Aaron Wan-Bissaka leh Brandon Williams te an awm. Spurs nen hian Phil Jones leh Axel Tuanzebe inhliam mah se Eric Bailly leh Diogo Dalot te an awm avangin inhliam hi chhuanlam a tling lo ang.

Tlarhma lamah Rashford a dam tawh a, Odion Ighalo an chelh thei a, Anthony Martial, Daniel James leh Mason Greenwood bakah tlema la naupang deuh Angel Gomes leh Tahith Chong te an awm. Tun hi United squad chhah lai tak a ni a, Solskjaer tana hna a ziaawm theih nan subsitute panga a hman theih hlauh.

Norwegian manager Solskjaer chuan, "Inkhelh pangngaiah chuan substition pathum hi a tawk chauh a, tun dinhmunah erawh panga kan hman a ṭul ang. Premier League hi a hautak em em a, season tharin a chhunzawm dawn bawk avnagin inhliam laka kan ven nan substitution hman thiam a ṭul dawn a ni," tiin inkhelh hma bakah player chhawr kim a tum thu a sawi.