Mizo zinga Skydiver hmasa ber SC Ramnunmawia

SC Ramnunmawia, Champhai Vengthlang chuan January ni 16, 2022 khan Skyhigh Narnaul Air Strip Skydiving Centre, Haryana aṭangin Solo Static Line Jump leh Instructor Assisted Deployment Course a zir chhuak a, Mizo zinga Skydiver hmasa ber a ni.

India ram chhunga International Skydiving drop zone awm chhun, Skyhigh Narnaul Air Strip Skydiving Centre-ah hian trainee mi 10 chiah an la a, ground training uluk taka an neihpui hnuah practical solo jump neih tir leh an ni. Jump-ah hian canopy steering, manouvere of parachute leh ground landing-a ti ṭha chinte chauh course zo china pawm an ni.

Mizo tlangval Ramnunmawia hi instructor Dr. Rajkumar Balakrishan hnuaiah a inzir. Dr. Rajkumar Balakrishan hian tawnhriat a nei ṭha a, United States Parachute Association instructor niin vawi 12,000 jump a nei tawh a, Arjuna Awardee, Tenzing Norgay Award a dawng tawh a ni.

Mizoram Aero sports Association (MASA) president J. Vanlalliana chuan, "SC Ramnunmawia’n Mizo zinga a hmasa ber ni tura Sky Diving course ṭha taka a zo thei hi a lawmawm kan tiin, kan chhuang takzet a, Mizoram Aero sports lamah hmasawnna rahbi thar min chuan kaipui leh ta," tiin a sawi a, a kal zelna turah duhsakna a hlan bawk.