Chelsea leh Timo Werner an inrem

Germany international Timo Werner chuan RB Leipzig aṭangin Chelsea a zawm dawn a, kum nga chhung atan inremna an ziak. Kum 24 mi forward hian Blues player ni turin medical paltlang a la ngai a, July thlaa German league season a tawp hunah London club a zawm ang.

Kum 24 mi Werner chuan, "Chelsea ka zawm thei hi ka lawm hle. Season thar khelh hun ka nghakhlel a, teammate leh manager  tharte nena thawhho a, Chelsea fans hmaa chet tlat ka châk tawh hle," tiin a sawi a, hmabak êng tak an neih thu a sawi.

Werner hi March 6, 1996 khan Stuttgart-ah a piang a, an khaw club VfB Stuttgart-ah football career ṭanin kum 2016 khan pound maktaduai 10-in RB Leipzig a zawm. Leipzig-ah Werner a vul chho a, season li chhungin Bundesliga-ah goal 76 a khung a, tun season-ah goal 32 khungin goal 26 hi league-a a khung a ni. 

German forward hi tlarhma lamah position hrang hrangah a khel thei a, goal a khung theih bakah a tlan chak bawk avangin Europe club lianin an hel nasa hle. Werner hi Liverpool nen sawi zawm a ni a, amaherawhchu Reds hian a release clause pound maktaduai 54 (€60m) an seng ngam lo. Hetihlai hian Chelsea erawhin top class player lak nan sum an seng ngam a, RB Leipzig duhlai an chhuhsak.

Werner an lakluh theih nana hmalatu pawimawh Chelsea director Marina Granovskaia chuan, "Europe-a player hming langsar ber zinga miin Stamford Bridge a rawn pan tur hi a phurawm hle. Amah hi a kum la naupang mah se tawnhriat a nei ṭha a, a theihnaah rinhlelh tur a awm lo," tiin a sawi.

Chelsea hian Werner hma hian season thar atan  Ajax aṭangin winger Hakim Ziyech chu pound maktaduai 37-in an lalut fel tawh bawk.