Mourinho enkawl Spurs an inpeih em?

Tottenham Hotspur tan chanchin ṭha leh ṭha a lo inkawp. Covid-19 vanga chawlh chhungin captain Harry Kane, South Korean star Son Heung-min leh January thlaa an lakluh Steven Bergwijn te an dam hman vek a, amaherawhchu hrem vangin Delle Alli a inlan thei dawn lo. Japhet Tanganga a inhliam a, Giovanni Lo Celso dinhmun a chiang lo bawk. 

Tottenham hian friendly match-ah Norwich City 2-1 in an hneh lo a, inelna takah erawh Jose Mourinho enkawl hmachhawn an hautak ang. Team pahnih hi an inhmachhawn hnuhnun berah Ole Solskjaer-a hote 2-1 in an chak a, Mourinho-a'n amah thlaktu lakah tlawm nawn a hreh ang.

January 1-a inhliam Kane-a'n khelmual a rawn rap leh dawn a, kuminah match 20 chauh a la inlan chungin goal 11 a khung. English striker chuan, "Ka malpui hliam a dam ṭha tawh a, chawlh hun ṭha ka nei hi ka vannei. Thla ruk chhung competitive match ka khel tawh lo a, hun rei tak a ni," tiin a sawi a, Mourinho-a'n bul a ṭan tur thu a sawi chiang bawk.

Spurs hi table-ah pariatnaah an awm mek a, chutihrualin point 41 an hmuh tawh avangin Champions League khel pha china awm Chelsea na phak lohna chu point sarih chiah a ni. Mourinho-a'n Chelsea a enkawl laiin Europa League a ngaih pawimawh loh thu a sawi a, Manchester United-a enkawl laia Europa League nomawi a chawi erawh a ngai hlu hle. 

Portuguese manager hian club tan chauh ni loin a mimal hlutna tisang turin Spurs hi Europa League tal a khelh phak pui a ṭul a, tun hnaiah result a neih tel loh avangin tun hmaa 'The Special One' inti ngam khan club lian a hip ta lo.