Hmun khatah Champions League khel dawn

European football-a thuneitu sang ber UEFA chuan Nilaini zan khan Champions League leh Europa League kal zel dan turah thutlukna a siam a, inelna pahnih hi Portugal leh Germany-a neih zawh turin an rel. 

Covid-19 vanga March hnua khelh chhunzawm theih loh Champions League leh Europa League-ah hian round of 16 khelh zawh loh a la awm ve ve a, match khelh zawh loh kalpui dan turah erawh UEFA hian thutlukna a la siam thei lo. 

Chutihrualin quarterfinal chin chu hmun pakhatah khelh tur a ni a, Champions League bik hi Lisbon, Portugal-ah khelh tur niin Europa League erawh Germany-a khawpui hrang hrangah khelh a ni thung ang. 

UEFA hian nakkuma khelh tura sawn tak Euro 2020 chungchangah thuthar an nei bawk a, inelna thlengtu tura an lo thlan tawh khawpui 12-te chuan inelna hun sawn mah se an thlen tho tur thu an tichiang. 

European football-a club inelna sang berah hian round of 16 second leg khelh tur match li a la awm a, UEFA chuan heng hmabak match li te hi August 7 leh 8-a khelh zawh turin a ruahman. 

UEFA hian buaina dang erawh a la nei - last 16 second leg khelh tur la awm te hi home & away anga kalpui chhunzawm tur nge neutral venue-ah khelh mai tur tih chungchangah thutlukna an la siam lo. 

Manchester City chuan an mualah Real Madrid mikhual an la hmabak a, Chelsea tan Bayern Munich khelmuala lenluh a la ṭul a, Juventus-in Lyon mikhual tur an la nei a, Napoli tan Barcelona lenchilh a ngai bawk.

Quarterfinal erawh Lisbon-ah single-leg a khelh tur a ni dawn a, August 12-23 inkara khelh zawh tura ruahman a ni. Final hi August 23-ah khelh a ni ang - kumin final khelhna tura ruahman sa Istanbul khawpui chuan nakkum final a thleng thung ang. 

European club football-a inelna sang ber dawttuah round of 16 khelh zawh a la ni bik lo a, August 5 leh 6-ah match khelh tur la awm hi an khel ang.

Last 16-a la khelh loh tawp match pahnih Inter Milan vs Getafe leh Sevilla vs Roma chu single-leg in khelh a ni ang. Match hnih dang second leg khelh tur la nei an awm bawk a, Eintracht Frankfurt leh Basel bakah LASK leh Manchester United inkhel tur a la awm.

UEFA chuan second leg khelh tur la awm hi home & away system-in a kalpui zei dawn nge, Germany-ah an khelhtir mai dawn tihah thuchiang an la siam lo. 

Europa League hi August 10 aṭangin quarterfinal khelh ṭan leh tur a ni dawn a, August 21-ah final khelh a ni ang. Germany-ah inelna hi neih a nih dawn avangin final khelhna tura ruahman sa Gdansk chuan nakkum final an 

thleng ang. 

Tun dinhmuna a lan dan chuan Champions League leh Europa League hi entu awm loa khelh a ngaih hmel a, mahse UEFA president Aleksander Ceferin chuan thuchiang a la awm loh thu a sawi thung. 

UEFA hotupa chuan, "Thla khat liam taah kha chuan inelna hi kan neih zawh theih dawn leh dawn loh pawh a chiang lo a, mahse tunah chuan kan khel thei ngei dawn niin a lang ta. 

"Entu awm leh awm loh tur chungchangah pawh thutlukna kan la siam lo. July thlatirah uluk takin kan dinhmun kan thlir leh phawt ang," a ti a, tuna thutlukna lo siam lawk chu a finthlak loh thu a sawi. 

Ceferin ṭawngkam aṭanga teh chuan UEFA hian entu awm ngeia Champions League leh Europa League  khelh chhunzawm hi an beisei niin a lang a, ticket an zawrhchhuah theih chuan sum hloh tur tam tak an hum thei ang. 

Champions League final chu Benfica khelmual Estadio da Luz-in a thleng dawn a, Women's Champions League chu Spain hmar lam ramin an thlen turin an ti bawk. Hmeichhe Champions League hi August 21 

aṭanga khelh tur a ni dawn a, Bilbao leh San Sebastian khawpui ten an thleng ang.

August 30-ah San Sebastian khawpuiah hian final khelh a ni dawn a, UEFA chuan Gothenburg (2021), Turin (2022) leh Eindhoven (2023) ten nakkum aṭanga final an inthlen chhawk dan tur an puang zui. 

Hetihlai hian nakkuma neih tur Euro 2020 chu June 11, 2021 aṭanga neih ṭan tur a nih thu an tichiang bawk a, playoff match khelh tur la awm chu international break laiin khelh tur a ni. 

Ruahman dan chuan October 9 leh November 12-ah international window hi hawn tur a ni dawn a, Euro 2020-a inlan tur team pawh ruahman anga thil a kaltluan chuan kan chiang vat dawn niin a lang.