United an chak, Mourinho a nghet
Manchester United ṭantu zingah Jose Mourinho chhuak tura duh an awm a nih chuan a thleng hnai dawn rih lo. Pathianni zan Premier League inkhelah khan Portuguese manager kaihhruai United chuan Turf Moor luhchhuahin Burnley 2-0 in an hneh.
International break a awm chhunzawm dawn a, chumi zawh September 15 hian Mourinho hoten Liverpool leh Chelsea ang thoa match hmasa pali chak vek Watford hmachhawn turin Vicarage Road an tlawh ang.
United an chungnung
Squad chhah lo zawk Burnley-in Ningani zanah Europa League playoff an khelh avangin ngai an la awh lo a, inkhelh ṭan aṭangin United an ngam lo.
Romelu Lukaku chuan minute 27-naah Alexis Sanchez siam chu a tauh lut a, minute 44-naah chiang zetin a volley lut leh bawk. Burnley tan keeper Joe Hart a khel ṭha a, England number 1 hlui hian first half-ah Lukaku leh Jesse Lingard goal khung tur a dan sak a, second half-ah Paul Pogba penalty a dang leh bawk.
Red card - Rashford
Minute 61-naah Marcus Rashford a rawn inlan a, minute 10 hnuah England forward hi hnawhchuah a ni. Burnley defender Phil Bardsley chuan Rashford ti thinrim turin a pet lui a, United rawlthar thinthawk hian ṭul lo takin a pan hnai a, an chal leh an chal a insi bawk.
Referee Jonathan Moss chuan yellow card leh red card hmangin thil thleng a ching fel a, Rashford a hrem na zawk. Awlsam taka chak thei tur United-in player 10-a an khelh avangin hun tawp lamah harsatna an neih phah.
Inkhelh banah Mourinho chuan, "Thil thlen dan ka hmu chiang lo. Rashford kha naupang â mai a la ni a, Bardsley erawh he infiamnaa kum 20 chhung tawnhriat nei tawh a ni thung," tiin a player-in inzirna tur a neih thu a sawi.
A fuh tawh em?
Manchester United buaina ber chu tlarhnung ni a, Burnley lakah goal an chhuah lo. Mourinho-a'n tlarhnungah Victor Lindelof leh Chris Smalling a dah a, hemite pui tur hian Nemanja Matic leh Marouane Fellaini te a dah kawp a. Portuguese manager-in midfielder lian pahnih a dah kawp hi a tifuh hle.
Defence lai a chak ṭhat avangin wing back pahnih Luke Shaw leh Antonio Valencia ten mual sir aṭangin na zawkin goal an nawr thei a, English left back hi a ke a tliah hnuah a vawi khat nan league match li chhung a khel tluan vek.
United an khel ṭha tluan tihin an sawi thei a, amaherawhchu an khingpui Burnley hian United an hmachhawn hma pawhin league match thumah vawi hnih chak loin vawi khat dang an inhnehtawk a, fiahna tak tak a ni lo.
Mourinho duhtu an tam!
Turf Moor-a United ṭantu 2,433 te chuan Mourinho hming an lam reng a, Portuguese hming rik loh lai hi minute nga pawh a tling ngai meuh lo.
Mourinho chuan, "Goal tam zawk kan khung sak thei lo kha pawi ka ti a, goal tam zawk khung ila hun nuam zawk hmang se ka duh hle a ni," tiin result ṭha neih zanah thiam takin mipui lawm zawng a sawi. United hi match liah point ruk hmuin Chelsea leh Liverpool point 12 in phak lo mah se Portuguese manager dinhmun a ṭha chhoah a ngaih theih.