Arsenal chak niah Spurs an tlawm

Pathianni zan Premier League inkhelah Arsenal chuan Cardiff City 3-2 in an luhchhuah a, Unai Emery nauten a vawi khat nan khualmualah hnehna an chang ta. North London club dang Tottenham erawh Watford mualah 2-1 in an tlawm thung, Javi Garcia naute hi a zawnin match li an chak ta!

Laipui a puak

Arsenal defender Shkodran Mustafi-a'n corner aṭanga ball lo kal chu minute 11-naah a tauh lut a, goal engzat eng an khung belh ang tih chu Gunners ṭantute beiseina a ni. Mahse, chawlhlawk hmain Victor Camarasa hmangin Cardiff lamin an sut, Gunners tlarhnung a la phui thei lo.

Box pawn aṭanga Pierre-Emerick Aubameyang-a goal khung chu Cardiff forward Danny Ward-a'n sut mah se, hun tawp hma deuhin Alexandre Lacazette-a'n hnai set sawt aṭangin chakna goal a khung.

Lyon striker hlui hian a kawppui Aubameyang goal khung tur a siamsak bawk; striker pahnih hian tun season chhunga a vawi khat nan inkhel bul an ṭan dun a, goal an khung bawk.

Arsenal tan midfielder Mesut Ozil a inlan leh thei tawh a, Germany international hlui hi goal nawr kawngah a thawh hlawk. Ozil-a'n tlarhma a puih laia a hnung lo dawltu Matteo Guendouzi chu mual chhunga player hmuhnawm a ni.

Nicolas Anelka, Cesc Fabregas leh Johan Djourou te hnung zuiin kum 19 mi Guendouzi hi Gunners player zingah kum 20 tlin hma a league match hmasa palia bul ṭan vek thei a ni.

Spurs an tlawm

Watford-in beisei aia ṭha a season bul an ṭan chu Tottenham tan pawh tih tawp sak ngawt theih an ni lo. Midfielder Abdoulaye Doucoure-a'n an mahni lamah tih lut mah se, Troy Deeney leh Craig Cathcart ten an khung bawk a, Harry Kane awmna Mauricio Pochettino nauten a chhan letna an nei lo.

1988 hnua a vawi khat nan Watford hian an league match hmasa paliah hnehna an chang a, tun season bikah chuan Liverpool leh Chelsea nen an pathum chiahin chak kim thei an ni. Champion lai Manchester City pawh la tlawm lo mah se, vawi khat an in draw tawh thung.

England captain Kane-a'n August thlaah goal khung tawh a, chutihrualin season dang ang bawkin kum tir lama goal khung a la harsat tho. Watford lakah pawh khung ngei tura ngaih a hlah a, a kawppui Lucas Moura pawh match hmasa angin a che ṭha reng thei bik lo a ni.

Spurs hian an captain leh keeper ni bawk Hugo Lloris chu malpui na vangin an chhawr thei lo a, a aiah Michel Vorm luhtir a ni. Defender Ben Davies leh Davinson Sanchez te an khel ṭha tawk lo a, anmahni thlaktu Danny Rose leh Eric Dier te pawhin beisei an phak chuang lo.