Old Firm Derby-ah Rangers chak lo

Liverpool legend Steven Gerrard kaihhruaina hnuaiah Rangers-in an chak lohna hmasa ber an tawng a, Old Firm derby-ah an hmelma Celtic hu 1-0 in an hneh lo.

Pathianni zan inkhela goal awmchhun hi Olivier Ntcham-a'n minute 62-naah a khung a, Celtic-in counter attack hmangin Rangers an vaw let nalh hle.

Celtic hi Liverpool boss hlui Brendan Rodgers a enkawl a ni a, Scottish football-a rorel mektu an nih bawk avangin Rangers boss Gerrard-a tan an chak lo hi na lehzual ang.

Gers ho hian March 2012 hnuah league derby-ah Celtic hi an la hneh leh lo a, Gerrard-a hnuaiah match 12 chhung hneh loh nei lo a an kal tluan tawh avangin besei sang tak an nei a. Amaherawhchu Rodgers-a kaihhruai Celtic erawh an la pha lo hle.

Celtic hian ball posses­sion 57% zet an chang thei a, shot vawi 16 neiin Rangers aiin 10 laiin an ngah a, Gerrard-a leh hoten nomawi an beisei dawn a nih chuan insiamṭhatna tur an la ngah hle.

Rangers boss Steven Gerrard chuan, "Referee-in foul a ham loh avangin kan lamah a goal phah a, 100% foul a ni," tiin an goal chhuah danah referee a mawhpuh a, first half-ah erawh an khel chhe zawk tih a pawm thung.

Celtic manager Brendan Rodgers chuan, "Inkhel ṭan aṭanga a tawp thlengin inkhel kan thunun. Steven khan a player-te a remkhawm ṭhat avangin dawhtheihna kan neih a ṭul a, inkhel scoreline hian inkhel awmzia a sawifhiah lo," tiin chak phu zawk an nih thu a sawi.

Scottish Premiership-ah Celtic hian pahnihna dinhmun an hauh mek a, Rangers erawh match liah point nga hmuin pasarihnaah an awm thung.