England-in India an hneh

England-in Pathianni zan khan fourth test ni linaah India chu run 60 in an hneh a, 3-1 in series an la.

September 7 aṭangin fifth test khelh a ni dawn a, India hi an chak a nih pawhin England hi an umpha thei tawh lo.

Test match chu

Ageas Bowl, Southampton-ah fourth test khelh a ni a, coin toss-ah England an chak a, bat hmasak an thlang.

Test match hi ni nga khelh a ni a, ni lina a nih chhoh tawh chuan pitch a ball sawh dah hi a mumal tawh loh avangin coin toss a chak hi a pawimawh a. Bat hmasak an thlang fo bawk.

Inkhel a nung

England an chefuh nghal chuang lo a, batting order tir lam an chebuai a; Alastair Cook, Keaton Jennings, Joe Root leh Jonny Bairstow te run siam zat belhkhawm chu 27 chauh a ni.

Amaherawhchu, all rounder Sam Curran rawn che ṭhain run 78 a rawn siam a, ani khelh ṭhat zarah England hian run 246 an tlin.

India bat hun a thleng a, Cheteshwar Pujara-a'n thi loin run 132 a siam a, Virat Kohli-a'n run 46 a siam ve tih loh chu midang zawngin chhuan run an vaw chhuak lo a. Mikhual team hian run 273-ah an thi vek. First innings zawhah India leh England-in beisei an nei ve ve a, inkhel a nung.

A tawpah England

Second innings-ah England tan Jennings (36) leh Root (48) te che chhe lo mah se mualneitu batting order an chesual nawn tiin a chhal theih. Jos Buttler-a'n run 69 a siam a, Curran-a'n run 46 a siam bawk a, run 271 an vaw chhuak.

England-in first innings-a an run siam zat 246 nen run 517 an siam a, India tan chak turin run 244 siam a ṭul a, ni hnih hun an nei bawk. Mikhual tan first innings-a an run siam zat an siam nawn theih chuan chak thei tur an ni a, amaherawhchu ni lina a inṭan tawh avangin bat a harsa tawh.

India batsman ten bul an ṭan fuh lo a, Pujara pawhin run nga chiah a siam. Captain Kohli (58 runs) leh Ajinkya Rahane (51) ten half century siam ve ve mah se spinner Moeen Ali ngam loin an thi. Kum 31 mi Moeen Ali hian run 71 pe mah se wicket li a la, ni khat khelh tur a la awm tihin India chu 184-ah an vawm hlum vek.

Eng nge an sawi?

Test match hmasa ber Edgbaston-ah England run 31 in an chak a, test match vawi hnihna Lords-ah khelh niin mualneitu innings leh run 159-in an chak. India-in Trent Bridge-ah hnehna an chang ve thung a, 203 runs in an chak.

India captain Kohli chuan, "Result thlir hian chak leh chak lo sawifiah mah se series kalhmang a sawifiah lo. Kan mualah chuan tumahin min khing phak loh avangin kan theihna sawifiah a ṭul lo. Amaherawhchu series rei tak kan khel a nih chuan a tir aṭangin kan huaisen a ṭul," tiin ṭan mar an mamawh thu a sawi.

India hian test series-ah kum 2013 khan England chu an ramah an hneh lo a, hemi hnu hian mahni mualah chuan hneh loh an tawng lo a. Ram pawnah erawh kumin khan South Africa chu 2-1 in an hneh lo tawh bawk.

Fourth Test
England : 246 (Curran 78) & 271 (Buttler 69, Shami 4-57)
India : 273 (Pujara 132*, Moeen 5-63) & 184 (Kohli 58, Rahane 51, Moeen 4-71)
England-in 60 runs in hnehna an chang; series 3-1 in an la