Rooney khelhna DC United an kal zel

England captain hlui Wayne Rooney-a'n goal khung a bansan thei lo. Nimin zing khan penalty a chhuih luh bakah a ṭhiante goal khung tur siam sakin DC United chu Atlanta United lakah 3-1 in hnehna a chanpui a, MLS playoff khel phak tumin hmalam an pan zel.

Kum 32 mi Rooney-a'n DC United a zawm tirh khan Eastern Conference-ah a hniam ber an ni a, tunah chuan playoff khel phak china awm Montreal Impact an phak lohna chu point ruk chiah a ni ta. Mahse, playoff hmain match thum bak khelh tur an nei tawh lo.

Manchester United tana goal khung hnem ber Rooney chuan, "Kan tan chuan chak a pawimawh tawh a, hnehna chan hi a hlu hle. Player dangte hnenah point thum hmu theih kan nih thu leh a pawimawhna ka hrilh a, an rilruah a tla na tih a hriat," tiin amah aia tawnhriat nei tlem zawkte chu fuih phur ngai an nih thu a sawi.