Hamilton a tlan chak ber
Pathianni zan khan Italian Grand Prix tlan a ni a, intlansiak hmuhnawm takah Lewis Hamilton chuan hnehna changin driver championship hmahruaitu a nihna a sawhnghet zel.
Autodromo Nazionale Monza-a intlansiakah Hamilton leh a elpui Sebastian Vettel te chu lap hmasa berah an intipalh. Ferrari driver hian a hnunga awm Hamilton-a tan intlanpelh tir theihna hun a pe zau lutuk a, insiamṭhat a tum lehna lamah an intai palh. Hei vang hian Pit Lane-ah a luh a ngai a, a dinhmun siamṭha leh tur chuan a harsa tawh - palinaah a thleng hram.
Mercedes driver Hamilton-a'n point 25 a hmuh belh avangin amah hnaih bertu Vettel aiin point 30 zetin a fal tawh a, season tawp hmain intlansiak pasarih a la awm dawn - an hma bakah hian point hmuh theih 175 zet a la awm avangin champion tur erawh a la chiang lo hle thung, inelna a nung chho dawn.
World champion vawi li ni tawh Vettel-a'n Hamilton el phak lo viau mah se, a teammate Kimi Raikkonen erawhin a thlahfal duh bik lo, a hmasa bera thleng tur hian a tawp thlengin an inum tawk hle, a tawpah erawh a pumpuia tlan ṭha zawk Hamilton a dingchang a ni.
Formula 1 intlansiak hi September 16 hian neih chhunzawm leh a ni dawn a, Singapore GP an tlan tur hi Ferrari tan fiahna a ni dawn. Season hmasa khan lap hmasa lamah an driver pahnih an chetsual tawhna a ni a, kuminah an tlawm nawn a nih chuan mualphona lian tak a ni ang.
Italian Grand Prix Results
# Driver Ram Team
1 Lewis Hamilton GBR Mercedes
2 Kimi Raikkonen FIN Ferrari
3 Valtteri Bottas FIN Mercedes
4 Sebastian Vettel GER Ferrari
5 Max Verstappen NED Red Bull
6 Romain Grosjean FRA Haas
7 Esteban Ocon FRA Force India
8 Sergio Perez MEX Force India
9 Carlos Sainz ESP Renault
10 Lance Stroll CAN Williams
World Championship Standings
# Driver Ram Team Points
1 Lewis Hamilton GBR Mercedes 256
2 Sebastian Vettel GER Ferrari 226
3 Kimi Raikkonen FIN Ferrari 164
4 Valtteri Bottas FIN Mercedes 159
5 Max Verstappen NED Red Bull 130
6 Daniel Ricciardo AUS Red Bull 118
7 Nico Hulkenberg GER Renault 52
8 Kevin Magnussen DEN Haas 49
9 Sergio Perez MEX Force India 44
10 Fernando Alonso ESP McLaren 44