A hma zawng aiin champion ka châk - Serena

Grand Slam nomawi ringawt pawh 23 la tawh mah se Serena Williams-i'n a la duhtawk mai lo. American nu hian tun hma zawng aiin fa a neih hnuah nomawi lian tham chawi a châk­na a nasat thu a sawi.

Pathianni zan US Open last 16 inkhelah Serena hian Kaia Kanepi chu 6-0, 4-6, 6-3 in a hneh. Tun inelna neih laiah a vawi khat nen set hloh ve ve mah se quarterfinal lut turin harsatna a tawk zui lem lo.

New York-ah hian a cham­pion leh thei a nih chuan hmeichhe tennis player piang tawh zinga Grand Slam chawi hnem ber a ni dawn, vawi 24 champion tawh Margaret Court-i record chu a nih rual chiah dawn a ni.

Kum 36 mi Serena chuan, "Fa neih hnua Grand Slam ka champion leh thei a nih chuan duhthusam thleng dik a ni a, mahse chumi tur chuan hna thawh hmabak ka la ngah hle a ni. Tun hma aia nasa khan tunah hian hlawhtlinna chan ka châk a, theihtawp ka chhuah zel ang," a ti.

July thla khan Serena hian Wimbledon final a lut leh tawh a, mahse German nula Angelique Kerber a ngam lo. US Open khelh laiah hmeichhe singles player langsar an tla nasa a, Serena tan Maria Sharapova leh khawtual nula Sloane Stephens te chu a kalkawnga hnawk sak thei tur an ni ang.