Champion beisei ngam Ramhlun North
MPL 7 ṭan hmain Ramhlun North-in MFA Super Cup-ah quarterfinal an thleng a, I Day Football-ah group stage an paltlang lo. An result thlirin team vantlang tur niin lang mah se team naran chunga awm an tum a, nomawi chawi ngei tumin hma an la mek.
Ramhlun North manager K. Lalenghluna (Maenga) chuan, "Champion turin squad kan thuam chak a ṭul tih kan hria a, MPL danin a phal zat foreigner pahnih kan be fel tawh. Anni hian tuna kan squad neihsa hi an thuam chak phak ngei ka ring," tiin Vanglaini a hrilh. Ramhlun North hian season liam taa an player John Ampong chu an be fel tawh a, Ghana midfielder hi Calcutta Football League-ah Customs tan khelin match nga a khelh tawhah man of the match-ah vawi thum thlan a ni tawh.
Tlarhma lamah veteran striker Waheed Adekunle an lalut thei dawn bawk a, I League Prayag United Sports Club tan pawha khel tawh Nigerian striker erawh MPL-ah a vawi khat inlanna tur a ni a, Ghanaian midfielder John Ampong angin a ṭha ngeia tiha han nemnghehna tur a awm lo. Ramhlun North hian squad an neih chhah sa avangin foreigner pahnih hian team famkim lohna hi a tih famkim theih besei a ni.
Ramhlun North hian Mizo player ṭha an kawl nual a, tlarhnungah MS. Dawngzela (Notea) leh Lalfelpuia te an kawl a, midfield-ah K. Lalnunzama te neiin goal nawr turin Lalliansanga, Laldingngheta leh Vanlallawma te an kawl a. An foreigner-te ṭhat dan a zirin semifinal an thlen loh chuan upset a tih theih ang.
MPL Season 7 hi September 6 aṭangin khelh ṭan a ni dawn a, Ramhlun North hian Zirtawpni zanah vawi hnih champion tawh Chanmari FC an hmachhawn ang. Season liam taa hlawhtling taka Zo United enkawltu coach Lalrozara tan fiahna hautak aṭangin a inṭan dawn.
# Hming Nickname Position Permanent Address
1 Lalsangliana Chawnglawi Sangliana Goalkeeper Lunglei
2 Liansangpuia Sangpuia Goalkeeper Dampui
3 Lalfelpuia Felpuia Centre Back Thingsulthliah
4 Lalremkunga Marema Centre Back Vangtlang
5 Lalramnghaka Nghaktea Centre Back Zawlnuam
6 MS.Dawngzela Notea Centre Back Zawlnuam
7 Lalmuanawma Muanawma Left Back Khawkawn
8 Lalnunpuia Valpuia Right Back Khawkawn
9 Malsawmtluanga Ralte Tluangtea Right Back Zemabawk North
10 Joseph Lalnunpuia Joseph Utility Salem Veng
11 Lalmawizuala Mawizuala Utility Nisapui
12 Lalmuanawma Muanawma Centre Midfielder Khawzawl
13 K.Lalnunzama Valtea Defensive Midfielder Zawlsei
14 Laldingngheta Dingngheta Winger Bethlehem Vengthlang
15 Lalrimawia Rimawia Midfielder Ramhlun North
16 RD.Lalremruata Remruata Midfielder Ramhlun North
17 Vanlallawma Lawma Forward Khawzawl
18 Jessy Vanlalmuana Jessy Forward Zobawk, Lunglei
19 Lalliansanga Notea Forward Kawn Veng, Durtlang
20 Lalnunmawia Mawitea Forward Ramhlun South
21 R.Lalthanmawia Amawia Forward Lamzawl