Barca-in goal sur tir

Barcelona chuan La Liga kai thar Huesca lakah zahngaihna an lantir lo. Catalan club hian an mikhual hi 8-2 ngawtin an sawp a, captain Lionel Messi leh Luis Suarez ten goal hnih ve ve an khung.

Nou Camp-a inkhelah mikhual lamin rin loh takin hma an hruai. Minute thumna lekah Watford aṭanga loan hmanga an lakluh Cucho Hernandez-a'n goal hmahruai a khung, a hnu lam erawh Messi leh a ṭhiante chan a ni tawh.

Argentine forward Messi-a'n an siphurh a sut a, Uruguay international nen goal hnih an khung bakah Ousmane Dembele, Jordi Alba leh Ivan Rakitic ten goal khat ṭheuh an belh a, Jorge Pulido-a'n an mahni lamah a ti lut palh bawk.

Club pahnihte hi 2014 khan Copa del Rey-ah an intawng tawh a, Barcelona lamin 8-1 in hnehna an chang tawh - an ngam takzat. League bika an chak chian ber ṭum erawh a ni lo, 2016 April khan Deportivo La Coruna chu 8-0 in an sawp tawh a ni.

Barcelona striker Suarez chuan, "International match kan khelh hmain ropui takin hnehna kan chang a, hei hi a pawimawh hle. Goal riat kan khung thei a nih chuan player zawng zawng kan khel ṭha tlang vek tihna a ni," tiin a sawi.

Ernesto Valverde naute hian La Liga season bul an ṭan fuh hle, league match thum an khelh tawhna hnehna an chang vek a, anni leh Real Madrid te chiah chu chak kim awmchhun an ni a. Spanish club lian pahnih hi season tluanin an inel tawk chho hle tura ngaih a ni.