AFC U16 Championship India hmabak a hautak dawn

Asian Football Confederation Under 16 Championship 2020 atan nimin khan draw neih a ni a, India chu South Korea, Australia leh Uzbekistan te nen group khatah an awm - a harsa dawn. 

Hriat tel tur erawh India hi qualifier-ah khan Uzbekistan, Turkmenistan leh Bahrain te nen an awmho a, match thum an khelhah tlawm nei loin AFC U16 khel tur hian an tling. AFC U16 Cham-pionship inelna hi Bahrain-in a thlen tur a ni a, September 16-ah inelna hi neih ṭan tura tih ni mah se Covid-19 vangin inelna hun hi November 25 - December 12, 2020-a neih turin sawn a ni. 

India hian kum 2002 leh 2018 khan AFC U16 inelnaah hian quarterfinal an lo lut tawh a, kum 2002-a India team-ah hian Jerry Zirsanga, Malsawma leh Vanlalrova te an tel - he inelnaah hian AFC U16 All Star team thlan a ni a, Jerry leh Malsawma hi an lang. 

AFC U16 2002 quarterfinal-ah hian South Korea chu 3-1 in an ngam lo a, he inkhela goal awmchhun hi Bawngkawn rawlthar Malsawma'n mawi zeta a khung a ni. 

Team 16 inelna tur AFC U16-a 2020 tling zingah hian India chauh hi semifinal la lut lo awmchhun an ni a, heti chung hian coach Bibiano Fernandes chuan beiseina an neih san thu a sawi. 

Group paliah team 16 hi ṭhen an ni a, team pali zelin an awm - group tina a sang pahnih hian quarterfinal an lut ang.