Roger Federer a liam ta!

Set hloh loin match hmasa pathum khel thei mah se Roger Federer-a'n US Open last 16-ah set khat chiah a la, Swiss star hi nimin zing khan world number 55 John Millman lakah 3-6, 7-5, 7-6 (9-7), 7-6 (7-3) in a chak lo; ropuina a chan tawh ṭhinna Arthur Ashe Stadium-ah lawm avanga a mittui luang ṭhin chu tun ṭumah chuan lungngaihna mittui in a thlak ta.

Mipa singles last 16 inkhel dangah Novak Djokovic chuan Joao Sousa hnehin, tun hnai kum 12 chhunga a vawi 11 nan quarterfinal a lut. Champion tura rinkai zinga tel phak Marin Cilic pawhin David Goffin hnehin a thiam pariat zingah a inhlangkai ve bawk.

Mangṭha Roger
Flushing Meadows, New York-ah kum dang ang bawkin Roger Federer chu player lawm hlawh leh mipui hmuh duh ber a ni a, a kum tam deuh tawh mah se champion tur inrinsiakna lamah pawh a buk a rit hle.

Mahse, kum 37 mi Federer-a'n beisei a phak lo, double faults vawi 10 ngawt a nei, unforced errors a neih zat chu 76 a ni! World number 2 hian ama tihsual vangin a khingpui hi point a pe hnem lutuk hret, darkar thum leh minute 38 an inkhelh chhungin set hmasa ber a la tih mai loh chu chungnung taka chet lai a nei lo.

Grand Slam vawi 20 champion tawh Federer hi inelna lianah chuan a tawhkhirh ber pawl a ni ziah, a bik takin player langsar lo zawkte lakah a chesual mawh hle. 2003 aṭanga chhiar ṭanin major tournament bikah world number 50 chunglam player pahnih chiah hneh loh a nei.

Federer hian Wimbledon 2012 khan second round-ah Sergiy Stakhovsky a ngam lo a, kha tih hunlai khan Stakhovsky hi world number 116 a ni; chumi hnuah world number 55 Millman a hneh lo leh chiah. Chawlh a tum thu la sawi chiah lo mah se a hun hnuhnung a hmang mek tih erawh court chhunga a chet dan aṭangin hmuh hmaih theih a ni lo.

Millman hi...
Australian tlangval John Millman hi kum 29 mi a ni tawh a, tennis ranking lamah chuan a tawn san ber ṭum a tawng mek. Infiamna huang a luhchilh hnuah hliam a nei ngun deuh a, 2011 khan infiamna a chawlhsan hial.

Mahse, 2015 khan a pianna Brisbane-ah a ṭhianpa Federer hnen hian match satliah an khel a, set a lak sak theih avangin inkhel leh turin phurna a nei thar a, tennis court chhungah a kir leh. Tun hnai maiah pawh Switzerland-ah an pahnih hian training an nei dun a ni - tunah chuan a ṭhianpa a hneh let ta der!

Hnehna a chan hnuah Millman chuan, "A thil lo tih tawhte avangin Federer hi ka ngaisangin ka chhuang hle a, tun ṭumah chuan a khelh ṭhat loh ni ka tawng a ni a. Ka tih theih ve chu theihtawpa beih let tawp kha a ni," tiin a sawi.

Djokovic a nghet
Wimbledon champion hlim Novak Djokovic chuan, Arthur Ashe Stadium-ah seeded chang phak lo Joao Sousa 6-3, 6-4, 6-3 in a hneh. Serbian tlangval hian quarterfinal-ah Millman a hmachhawn leh dawn, duhthlang thei pawh ni se Federer aiin Millman hi a thlang ngeiin a rinawm.

Seeded parukna Djokovic hi a kiu hliam vangin season hmasa chawhnu lam aṭangin a buai a, chawlh kar 54 chhung zet nomawi a chawi lo. Amaherawhchu, a hliam a dam chiang tawh a, July thla khan Wimbledon title laiin, tun ṭumah hian match li a khelh tawh chinah set khat chiah a la hloh a ni.

Inkhel dangah Marin Cilic chuan darkar hnih leh minute 24 chhungin David Goffin 7-6, 6-2, 6-4 in a hneh a, Croatian tlangval hian semifinal thleng tur chuan Kei Nishikori a hmachhawn leh ang.

Japanese player Nishikori hian Philipp Kohlschreiber chu 6-3, 6-2, 7-5 in a lo hneh ve bawk. Quarterfinal-a a hmachhawn tur Cilic nen hian 2014 US Open final-ah khan an lo intawng tawh a, Cilic-a'n hnehna changin nomawi a chawi - kuminah chuan semifinal luh an inchuh dawn ta zawk a ni.