Aizawl FC-in MPL dan thar hlawkpui
Mizoram Premier League season 7 aṭangin foreigner pathum ziah luh theih a ni a, I League club Aizawl FC tan dan thar hi malsawmna a ni ang.
MPL-a vawi hnih champion tawh Aizawl FC-in captain Alfred Kemah Jaryan bakah Ghanaian forward Francis Dadzie leh Malian midfielder Amadou Alou Sissoko te an lalut.
Amaherawhchu, playing XI-ah kum dang ang bawka pahnih tho chhawr theih a nih dawn avangin coach Gift Raikhan-a'n a hmanraw ṭha neih hi a chhawr thiam a ṭul ang.
Squad a chhah
Aizawl FC hian goalkeeper ṭha pathum an kawl a, Mizo pahnih Lalawmpuia leh Lalremruata te hi starting eleven tura rintlak ve ve an ni a. Mahse, Punjab aṭangin Gurpreet Singh Chabmal an chahluh avangin Mizo keeper ṭha pahnih tan khelh phak a harsa dawn.
Tlarhnungah Chhinga Veng aṭangin Lalrinchhana Tochhawng an lalut thei a, Neroca aṭangin Moirangthem Govin Singh an nei thar bawk a, an squad chhah sa a ṭhat belh. Defence lai leh sirah player beiseiawm tak tak a kawl khawm a, I League club tana khelh phak ringawt pawh hi a awlsam lo ang.
Midfield-ah Alfred leh Sissoko te an nei tawh a, season ṭan tirhah an inthlawp nghal rinawm lo mah se an inkawp chho a nih chuan a entlak khawp ang.
Chutihrualin midfelder lar David Lalrinmuana leh hmabak nei êng Paul Ramfangzauva leh K. Lalhmangaihkima te pawhin khelhna hun a neih theih a rinawm.
I Day Football leh MFA Super Cup aṭanga thlirin Khawlailung tlangval Lalrinfela an lalut fuh viau niin a lang.
Lalkhawpuimawia'n goal khung dan thuruk a hre chho ṭan a, Chhinga Venga Malsawmfela'n a khuh bo Kelkang tlangval Mapuia theihna tak tak a lan chhoh a rinawm a; chutihrualin mipui chuan North East United tana khel tawh Francis Dadzie an hmu châk ang.
An lungawi
Aizawl FC-in MPL khel turin player 29 an ziaklut a, nomawi chawi tura rinawm ber ang hiala sawi theih an ni.
I League club technical director Hmingthansanga chuan, "Kan player lak danah kan lungawi a, kan player neih dan thlirin champion thei squad chu kan dinin ka hria," tiin Vanglaini a hrilh.
I League club hian kumin I Day Football-a an match hmasa berah MPL club thar Electric Veng FC an hneh lo a, Zirtawpni tlai hian MPL match hmasa berah phuba lakna remchang an nei ang.
# Hming Nickname Position Permanent Address
1 Lalawmpuia AwP-a Goalkeeper Aizawl Venglai
2 Lalremruata Remruata Goalkeeper ITI Veng
3 Gurpreet Singh Chabmal Gurpreet Goalkeeper VPO Chhabalpati (Punjab)
4 Hmingthanmawia Valpuia Centre Back Ramhlun North
5 Lalhriatrenga Achia Centre/Right Back Chanmari
6 Lalrinchhana Tochhawng Rinchhana Centre Back Chanmari
7 SR.Lallawmawma Lawma Centre Back Hlimen
8 V.Lalchhuanawma Chhuantea Centre Back Ramhlun North
9 Moirangthem Govin Singh Govin Centre Back Tenthakhonou, Manipur
10 Lalbiakzuala Btea Left Back Thingsulthliah
11 Lalramhmunmawia Tea Left Back Bilkhawthlir
12 Joe Zoherliana Zohera Right back Lengpui
13 K.Lalhmangaihkima Hmangaihkima Centre Midfielder Tuithiang Veng
14 Paul Ramfangzauva Paul Centre Midfielder Vengthar, Kolasib
15 Alfred Kemah Jaryan Alfred Centre Midfielder Monrovia, Liberia
16 Amadou Alou Sissoko Sissoko Centre Midfielder Bamako, Mali
17 David Lalrinmuana David Playmaker Zemabawk North
18 Jesse Laldinpuia Ralte Jesse Left Winger Khatla
19 Vanlalduatsanga Duata Utility Mamit
20 Albert Zohmingmawia Albert Winger Kawnpui
21 Isak Vanlalruatfela Isak Winger Thingsulthliah
22 Lalrinfela Rinfela Winger Khawlailung
23 David Lalbiakzara Biakzara Winger Champhai Bethel
24 Lalkhawpuimawia Mapuia Striker Kelkang
25 F. Lalremsanga Remsanga Forward Lengpui
26 Jonathan Lalrawngbawla Jona Forward Electric Veng
27 Lalruatfela Fela Forward Republic Vengthang
28 Rochharzela Rochhara Forward Chhinga Veng
29 Francis Dadzie Dadzie Forward Accra, Ghana