NE Snooker C’ship an ṭan ta

India hmarchhaka snooker inelna lian The Aijal Club North East Snooker Championship 2018 chu nizan khan Aijal Club president-in Hawla Indoor MSBA hall-ah a hawng.

Inelna hi Mizoram Snooker Billiards Association kaihhruaina hnuaiah September 8, Inrinni thleng Hawla Indoor MSBA hall leh Aijal Club Billiards room-ah neih a ni dawn.

Inelnaah hian Billiards and Snooker Federation of India hnuaia hmarchhak state inziaklut - Meghalaya, Assam, Nagaland leh a thlengtu Mizoram player ṭhate an inel ang.

Eng nge Snooker chu?

Snooker hi table liana khelh a ni a, lut tur chuan dik thlapa hawlh fuh a ngaih avangin khawvel a game har ber zinga an sawi fo a ni. Ball sen 15 a awm a, colour ball yellow, green, brown, blue, pink leh black te an awm bawk. Red ball in point khat zel a keng a. Colour ball hian 1-7 point an indawt dan ang hian a keng tel a, black ball (7 pts) chu point ngah ber a ni.

Red ball hawlh luh zawahah color ball zel hawlh tur a ni a, a kalphung chu red ball - ball rawng eng pawh - red ball - ball rawng eng pawh... tiin a kal zel. Colour ball te hian awm bikna spot an nei a hawlh luh hnuah phawrh leh zel an ni. Red ball erawh colour ball tum theihna, hawlh nawn theihna a ni a, a luh tawh chuan phawrh nawn a ni tawh lo thung.

Hawlh luh zawh emaw hawlh luh zawh hmain point sang zawk pawhthlak theih loh chinah frame a la mai ṭhin. Player pakhat zawk a chet ve hauh hmaa a khingpuiin a hawlh luh vek ṭum pawh a thleng thei a, hei erawh a thleng zen zen lo.