Mangṭha Maria Sharapova

Flushing Meadows, New York-ah hmeichhe player langsar an liam zel. Nimin zing US Open last 16 inkhelah Maria Sharapova chu Carla Suarez Navarro lakah 6-4, 6-3 in a tlawm; Russian nula hian unforced errors vawi 38 ngawt a nei.

Player pahnihte hi vawi ruk an intawnna chiah a ni a, Sharapova-i'n vawi li hnehna chang tawh mah se a ṭum hnih chak lohna a tawng thung. Grand Slam vawi nga champion tawh hian 2012 hnua a vawi khat nan champion leh a tumna chu last 16-ah a tawp.

Kum 30 a tlin champha chiahah Suarez Navarro-i'n player langsar a hneh a, a vawi hnih nan US Open quarterfinal a khel dawn. Suarez Navarro chuan, "Arthur Ashe Stadium-ah hian tun hmain Maria-i'n match 22 a khelh tawhah hnehna a chang vek tih ka hria, tun ṭuma a vawi khat nan a chak lo mai hi ka tan pawh awih a har hial, ka khelh ṭhat ber ṭum ka tawng a ni," a ti.

Damdawi hman phal loh a hman avangin Sharapova hi thla 15 chhung hrem a ni a, hremna a hman zawh hnuah tun hma lama a ropui tawhna ang kha a la tawng leh thei rih lo, kum 31 mi a ni tawh a; tho chhuak leh tur chuan inbuatsaihna a neih ngawrh zual a ngai ang.

2006 US Open champion Sharapova chuan, "Hringnunah hian beisei leh duhthusam tam tak kan nei thei a, a ṭhen a hlawhtlin laiin a ṭhen erawh beisei angin a kal bik vek lo. A bik takin kum 31 tlin tawh chuan kan duh leh beisei ang tih vek hi a harsa tawh a ni," tiin a sawi.

Inkhel Thlirna Tawi
Navarro Stats Sharapova
0 Aces 2
3 Double Faults 8
42/63 (67%) First Serve % In 42/60 (70%)
26/42 (62%) Win % On 1st Serve 20/42 (48%)
8/21 (38%) Win % On 2nd Serve 7/18 (39%)
3/4 (75%) Net Points Won 3/7 (43%)
6/8 (75%) Break Points Won 3/8 (38%)
33/60 (55%) Receiving Points Won 29/63 (46%)
15 Winners 15
20 Unforced Errors 38
67 Total Points Won 56