Mizoram tan Kohli

Cricket Association of Mizoram chuan nimin khan tun season atana professional pathum an lak tur chu an tichiang. Taruwar Kohli, Sinan Khader leh Akhil Lalchand Rajput an lakluh thu an puang.

CAM hian August thla tawp khan Mizoram aiawh tur tualchhung player 12 an puang tawh. Durtlang tlangval K. Vanlalruata chu captain atan ruat a ni a, coach atan Lalruatsanga Vanchhawng an ruat bawk.

Mizoram hian September 19 aṭangin Vijay Hazare Trophy an ṭan dawn a, he inelna hi One Day a ni a, 50 overs niin inelna ngaihhlut zawk Ranji Trophy inpuahchah nan hman ṭhin a ni.

Kohli dang

Tun ṭuma Mizoram lak kum 29 mi Taruwar Kohli hi tuna India captain Virat Kohli kaihhruaina hnuaiah kum 2008 khan Under-19 Cricket World Cup-ah India a champion-pui a, batsman rinrawl a ni.

He inelnaah hian Taruwar hian match rukah run 218 a siam a, a zawn zatin half century vawi thum a siam. Semifinal-a New Zealand an hneh ṭumin man of the match-ah thlan a ni.

Punjab batsman hian 2012-13 season khan Ranji Trophy semifinal-a Jharkhand nen an inhmachhawn ṭumin triple century a siam a. IPL-ah Kings XI Punjab tan a khel tawh.

Midang pahnih

India rama che ṭha tur chuan spinner ṭha neih a ṭul a, Rajasthan Royals leh Kings XI Punjab tan a khel tawh leg spinner ṭha Sinan Khader an la. Karnataka spinner kum 29 mi hi Mizoram tan ṭhatpui tham a nih a beiseiawm.

Player pathumna Akhil Rajput erawh kum 29 mi ni tawh mah se ṭha ber zinga tel pha a ni lo a, amaherawhchu India coach lar Lalchand Rajput fapa a ni. Akhil-a pa Lalchand hi India aiawhin Test leh ODI-ah a inlan ve ve tawh a, Zimbabwe national team a enkawl mek. Mumbai tlangval Akhil erawh Ranji-ah an state tan a la inlan pha lo a, amaherawhchu Mizoram tana khel tur chuan a ṭha hle.