Best FIFA Men Player Lionel Messi a tel ve lo!
Football khawvela thuneitu sang ber FIFA chuan khawvela footballer thiam ber thlanna Best FIFA Men Player Award chawimawina dawng thei tur hming pathum a chhawp chhuak a, hming chhawpchhuah zingah Lionel Messi a tel ve lo.
Cristiano Ronaldo, Luka Modric leh Mohamed Salah te chu he chawimawina dawng tur zingah hian chhawpchhuah an ni a, UEFA-in tun hnai lawka a sem UEFA Player of the Year top three te tho khan an ni - Modric chuan he chawimawina hi a dawng.
Coach of the Year chawimawina dawng thei tur pawh chhuapchhuah a ni a, World Cup-a France champion puitu Didier Deschamps, Croatia coach Zlatko Dalic leh Real Madrid boss hlui Zinedine Zidane te chu coach ṭha ber ni thei dinhmunah hian an ding.
Hmeichhe lamah chuan Champions League-a Lyon an champion theih nana thawhhlawk Ada Hegerberg leh Dzsenifer Marozsan bakah Brazil legend Marta te hming chhawpchhuah a ni bawk.
Mangṭha Messi?
Kum 31 mi a ni tawh a, UEFA Player of the Year dawng thei zingah chhawpchhuah a ni tawh lo bawk a, Lionel Messi a chuai ta em ni? tih chu zawhna piang nghal a ni a, season hmasaa a khelh dan leh tun season-a a khelh dan en erawhin 'Aih' tia chhan chu chhanna pek awl zawk a ni si.
Messi hian season hmasa khan match 54-ah goal 45 a khung a, Copa del Rey leh La Liga-ah Barcelona chu a champion pui bawk. Mahse, FIFA hnuaia player ṭha ber hi ram tin coach, captain, journalist thlan bik leh fan-ten an thlan a ni a, group khat hian 25% zel vote an keng.
Hetihrual hian Lionel Messi chauh a ni lo, Atletico Madrid forward Antoine Griezmann chu a ṭha pathum zingah a tel lo bawk. Kum 27 mi forward hian season hmasa khan goal 29 khungin Atletico chu Europa League-ah a champion pui a, France chu World Cup-ah nomawi a chawipui bawk.
Barcelona chuan, "Sawi belh tur a awm chuang lo, Barca fans mitah chuan i ṭha ber," tiin twitter lamah an thiampuipa an chhan a, Atletico Madrid chuan Griezmann-a thlalak, World Cup, Europa League leh UEFA Super Cup nomawi nena a ṭhu dun lai an pho chhuak a,"Ṭawngkain a hrilhfiah zo lo ang," tih an ziak.
Mi pathum chu
Cristiano Ronaldo-a'n Juventus a pan hnuah goal la khung lo mah se August 9 hma khan vote thlak zawh a ni tawh a, top three-ah a lang tho. Kum 33 mi forward hian season hmasa khan goal 44 a khung a, Champions League-ah Real Madrid chu nomawi a chawipui bawk.
World Cup-ah a chet ṭhat miau avangin Luka Modric hming a lang a, Croatian midfielder hian rin loh takin Croatia chu World Cup final a hruai thleng a, Golden Ball a dawn bakah UEFA Player of the Year-ah thlan a ni fel der tawh.
Mohamed Salah-a'n nomawi chawi lo mah se team 'naran' a ngaih Liverpool chu Champions League final a hruai thleng a, kum 1990 hnua a vawi khat nan Egypt chu World Cup-a hruai thleng bawk.
Reds tan match 52-ah goal 44 a khung a, Premier League-ah match 38 chauh a awm hnua goal 32 khung tling hmasa ber record siamin mimal chawimawina dawn theih ang zawng zawng chu a hui kim.
Coach ṭha
Didier Deschamps-a'n France squad-ah thutlukna huaisen thlak tak tak a siam chungin World Cup nomawi a chawipui a, player leh coach nichunga world champion ni kawp thei Mario Zagallo leh Franz Beckenbauer hnung a zui a, khawvela coach ṭha ber chawimawina dawng thei dinhmunah a ding mek.
World Cup final-a France ngam lotu, Croatia coach Zlatko Dalic chu coach ṭha ber ni thei zingah a tel a, world champion ni ta lo mah se an ram dinhmun thlirin final thlen ringawt pawh hi coach ṭha ber ni thei zinga tel nan a tawk.
Zinedine Zidane-a'n tun season-ah club enkawl nei tawh lo mah se season hmasa khan Real Madrid chu season thum chhunga a vawi thum nan Champions League nomawi a chawipui a, coach ṭha berah an thlang a nih pawhin a awm lo hran lo ang.
Premier League-a Manchester City champion puitu Pep Guardiola, Barcelona tana nomawi pahnih chawitu Ernesto Valverde leh Champions League final-a Liverpool hruai thlengtu Jurgen Klopp te chu pathum zinga tel pha lo langsar an ni.
Chawimawina dang
UEFA goal of the year-a thlan ni tawh Ronaldo-a'n tuna a khelhna Juventus lama Champions League-a a khung chu goal mawi ber 'Puskas Award' chawimawina dawng thei tura chhawpchhuah a ni, Gareth Bale-a'n Champions League final-a Liverpool laka overhead kick a neih chu chhawpchhuah a ni bawk.
Goalkeeper ṭha ber ni thei dinhmuna ding zingah UEFA-in Europe-a goalkeeper ṭha bera an thlan hlim Keylor Navas a tel lo a, Real-a a elpui Keylor Navas chu he chawimawina dawng thei dinhmunah hian a ding thung. Belgian keeper bakah hian Tottenham Hotspur keeper Hugo Lloris leh Leicester City keeper Kasper Schmeichel hming a lang tel.
Goalkeeper ṭha ber ni thei dinhmuna ding pathumte hi World Cup-a an chet ṭhat avanga chhawpchhuah vek an niin a lang a, Champions League lama che
ṭha Navas tan hmun a awm lo hi a awm lo hran lo.
FIFA chuan Fan Award a sem dawn bawk a, Chilean second division club Deportes Puerto Montt fan ruhkawl, a team inkhel en tura km 3000 zet mahnia zin Sebastian Carrera, World Cup-a Peru inkhel en tura zin Peruvian fans 40,000 leh World Cup-a an ram team inkhel en zawha stadium ti faitu Japan & Senegal fan-te chu he chawimawina dawng thei tur hian chhawpchhuah an ni.
FIFA Award dawng theite
Men Player
Cristiano Ronaldo Juventus & Portugal
Luka Modric Real Madrid & Croatia
Mohamed Salah Liverpool & Egypt
Women Player
Ada Hegerberg Lyon & Norway
Dzsenifer Marozsan Lyon & Germany
Marta Orlando Pride & Brazil
Men coach
Zlatko Dalic Croatia
Didier Deschamps France
Zinedine Zidane Real Madrid
Women coach
Reynald Pedros Lyon
Asako Takakura Japan
Sarina Wiegman Netherlands
Goalkeeper
Thibaut Courtois Real Madrid & Belgium
Hugo Lloris Tottenham & France
Kasper Schmeichel Leicester & Denmark
Puskas Award
Gareth Bale (Real Madrid) v Liverpool
Denis Cheryshev (Russia) v Croatia
Lazaros Christodoulopoulos (AEK) v Olympiakos
Giorgian De Arrascaeta (Cruzeiro) v America MG
Riley McGree (New. Jets) v Melbourne
Lionel Messi (Argentina) v Nigeria
Benjamin Pavard (France) v Argentina
Ricardo Quaresma (Portugal) v Iran
Cristiano Ronaldo (Real Madrid ) v Juventus
Mohamed Salah (Liverpool) v Everton
Fan Award
Sebastian Carrera (Deportes Puerto Montt, Chile)
Peru fans
Japan and Senegal fans