Ram inelna kalphung thar UEFA Nations League belchiang ang
Europe rama football thuneitu sang ber UEFA chuan ram inelna ṭha zawka kalpui tumin inelna thar an duang a, a hmingah UEFA Nations League an vuah.
Inelna match hmasa ber chu Ningani zan dar 1:45 hian Germany leh France-in an khel dawn a, kalphung tharah hian ram hrang hrang te chu an ṭhat dan milin category hrang hrangah dah an ni.
A in ṭan dan
Inelna lian FIFA World Cup leh Euro C'ship baka Europe ram te khelh ṭhin chu friendly match a ni a, an duhkhawp lo.
Kum 2011 khan hemi chungchangah UEFA Strategy Meeting chu Cyprus-ah neih ṭan a ni a, kum thum chhung zirchian a nih hnuin March 27, 2014-a UEFA khawmpui lian vawi 38-na Astana-a neih neih ṭumin lungrual taka pawm a ni.
Inelna neih hun
UEFA Nations League hi September, October leh November, 2018-ah te khelh a ni dawn.
Friendly match aiah inelna hi neih a ni dawn a, chutihrualin group tina team awm zat te a inan thlap thlap loh avangin an awl
ṭumah chuan friendly match a awm chhunzawm zel ang.
Euro 2020 nen a inzawm em?
Euro 2020 khel tur zawnna qualifiers hi March 2019 aṭangin khelh ṭan a ni dawn a; March, June, September, October leh November 2019-ah te neih tur a ni.
Hetah hian team 55 chu team panga awmna group nga leh team paruk awmna group ngaah ṭhen an ni dawn a, group tin aṭangin a sang ber leh pahnihna chu Euro 2020 khel turin an tling dawn a, team 20 an ni chiah ang.
Inelnaah hian team 24 tan an inlan dawn a, hmunruak pali la awm chu playoff hmangin March 2020-ah zawn a ni ang. Hetah hian Nations League a pawimawh thung.
League tin tan hmunruak pakhat zel zuah a ni dawn a, League A hmunruak pakhat hi group hmahruaitu paliin an inchuh dawn. Qualifier kaltlanga group hmahruaitu an tling tawh a nih chuan a hnuaia ram ten chance an nei ang a, league A tawpin team pali an thawh theih loh chuan a hnuaia league a mi lak chhoh an ni ang.
Hetiang tho hian league hnuai pathum pawh a kal dawn. Playoff khelh dan hmang tur hi semifinal leh final angin a kal ang a, single leg-a khelh ve ve tur a ni.
Kalphung thar chu
UEFA Nations League-ah hian promotion leh relegation a awm ve vek a, European national team vawi 55 te chu league pali-ah 11 October 2017-a an ranking dinhmun milin ṭhen sawm an ni.
League A chu ram ṭha ber awm khawmna a ni a, League D chu a hniam ber a ni thung.
League A
Group A1 : Germany, France, Netherlands
Group A2 : Belgium, Switzerland, Iceland
Group A3 : Portugal, Italy, Poland
Group A4 : Spain, England, Croatia
• Ram 12 chu pathum zelin group thumah an ṭhen a, group tina a sang ber ṭheuhin UEFA Nations League Finals an thleng ang. Finals-ah hian semifinal, third place leh final te a awm ang.
• Final round hi June 2019-a neih tur a ni a, hemi thleng pha ram pali aṭanga pakhatin inelna hi an thleng a, hei hi December 2018-ah tihfel a ni ang.
• Group tina a hniam ber ṭheuh erawh kum 2020-a inelna neih ṭhat leh hunah League B-ah tla thla ang.
• A sang pali zingah UEFA Euro 2020 tling pha lo an awm a nih chuan March 2020-a playoff khelh hunah an tel phalsak an ni ang a, hmunruak pakhat zuah sak an ni ang.
League B
Group B1 : Slovakia, Ukraine, Czech Republic
Group B2 : Russia, Sweden, Turkey
Group B3 : Austria, Bosnia and Herzegovina, Northern Ireland
Group B4 : Wales, Republic of Ireland, Denmark
• Team 12 chu group pathumah ṭhendarh an ni.
• Group tina a sang ber chu kum 2020-ah League A-ah an tling ang a, a hniam ber ṭheuh erawh League C-ah an tla thla thung ang.
• A sang pali zingah UEFA Euro 2020 tling pha lo an awm a nih chuan March 2020-a playoff khelh hunah an tel phalsak an ni ang a, hmunruak pakhat zuah sak an ni ang.
League C
Group C1 : Scotland, Albania, Israel
Group C2 : Hungary, Greece, Finland, Estonia
Group C3 : Slovenia, Norway, Bulgaria, Cyprus
Group C4 : Romania, Serbia, Montenegro, Lithuania
• League C-ah team 15 an awm a, group khatah team thum awmin a dang zawhah team li an awm.
• Group tina a sang ber chu kum 2020-ah League B-ah an tling ang a, a hniam ber ṭheuh erawh League D-ah an tla thla thung ang.
• A sang pali zingah UEFA Euro 2020 tling pha lo an awm a nih chuan March 2020-a playoff khelh hunah an tel phalsak an ni ang a, hmunruak pakhat zuah sak an ni ang.
League D
Group D1 : Georgia, Latvia, Kazakhstan, Andorra
Group D2 : Belarus, Luxembourg, Moldova, San Marino
Group D3 : Azerbaijan, Faroe Islands, Malta, Kosovo
Group D4 : FYR Macedonia, Armenia, Liechtenstein, Gibraltar
• Team bang 16 te chu pali ṭheuhin group liah ṭhendarh an ni.
• Group tinah a sang ber ṭheuh chu League C-ah an tling ang.
• A sang pali zingah UEFA Euro 2020 tling pha lo an awm a nih chuan March 2020-a playoff khelh hunah an tel phalsak an ni ang a, hmunruak pakhat zuah sak an ni ang.