James-a'n UCL nomawi a duh
Bayern Munich midfielder James Rodriguez chuan tun season chhunga an thil tum lian tak chu Champions League nomawi chawi a nih thu a sawi, Bundesliga champion hian league bakah inelna lian dang an duh tih a hriat theih.
Colombia international James hian season hmasa khan kum hnih chhung atan Bayern hi loan hmangin a zawm a, Real Madrid-ah khelhna chang mumal lo mah se Allianz Arena-ah chuan player pawimawh a ni phak.
Season hmasa khan Bayern-ah manager pahnih Carlo Ancelotti leh Jupp Heynckes te a hrawn hman a, goal sarih a khung bakah a ṭhiante goal khung tur dang 11 a siam sak bawk - season kal laiah player pawimawh a ni chho mek.
Kum 27 mi Rodriguez chuan, "Champions League hi inelna hautak tak chu a ni ngei a, mahse keini ang Bayern Munich chuan champion kan inring tur a ni. Kan khingpuite chu eng team pawh ni se chak tumin khelmual kan lut ang," a ti.
Bayern Munich hian 2013 hnuah UCL nomawi an la chawi leh lo, a zawnin season ruk chhung Bundesliga champion ni thei mah se European club liante inelnaa an hlawhltin lohna a rei tawh, hei vang hian coach thar Niko Kovac kaihhruaina hnuaiah chona hautak an hmachhawn dawn a ni.