Osaka-i'n quarterfinal lut

Naomi Osaka leh Kei Nishikori ten US Open quarterfinal an lut a, New York khawpuiah Japanese tennis player pahnihin mipa leh hmeichhe singles huanga last 16 an pal­tlang rual ṭum khatna a ni.

Mipa player Nishikori chu khawvel huapin a lar sa a, a thiam pariat zinga a tel hi a mak lo. Thawhṭanni zan khan hmeichhe singles player Osaka hian Aryna Sabalenka chu 6-3, 2-6, 6-4 a hnehin an ram tlangval tih theih ang a ti zui ve a ni.

Kum 20 mi Osaka chuan, "Inelna lian tak maiah a thiam pariat zinga ka tel hi ka lawm a, awih a harin mak pawh ka ti hle. A vawi khat nan final khelh ka chakin beiseina pawh ka nei sang ve hle," a ti. Seeded 20-na Osaka hian a match lehpekah chuan Lesia Tsurenko a hmachhawn leh ang.