Atletico thinrim an inhrosa

Champions League khelh tum Atletico Madrid-in ngaihthah chi an ni lo tih pholangin Osasuna chu 5-0 zetin an nghaisa a, La Liga ṭan leh a nih hnua an match hmasa bera Athletic Bilbao an inhnehtawkpui kha 'tihpalh' a ni tih an pholang.

Hliam avanga Bilbao laka inlan thei lo Joao Felix chuan Atletico mamawh chhanna a ni tih a pholang a, Portugal forward hian goal hnih a rawn khung. 

Felix bakah hian Atletico tan Marcos Llorente, Alvaro Morata leh Yannick Carrasco te chuan goal khat ṭheuh an khung bawk a, mualneitu Osasuna lamin tih theih an nei lo - an hawihai. 

Atletico Madrid hian hnehna an chan avangin top four-ah an inhlangkai leh ta a, nizana inkhel Real Sociedad result a zirin panganaah an tla leh thei thung - Sociedad result hi he thu buatsaih a nih lai hian kan hre hman lo. 

Atletico tan bul ṭantu zingah Joao Felix a rawn tel a, in lam aṭanga lo entu fan-te tan chuan hmuh nuam a ni - May thla tawp lam khan Felix hian club training-naah hliam a tuar a, Atletico tan thu hriat nuam a ni lo. 

Hlauhthawn ang ngeiin La Liga ṭan leh hnua an match hmasa berah squad-ah hmuh tur a awm lo a,  hnehna an chang zo lo zui. Mahse, Nilaini zana an inkhelah rin loh takin bul a rawn ṭan a, goal hmangin a dam tawh tih a pholang zui. 

Kum 20 mi forward hian minute 27-na lekah goal hmahruai hi a khung a, minute 56-naah a goal hnihna a khung bawk - a goal hnihna hi Bilbao laka goal khungtu Diego Costa siamsak a ni. 

Felix chuan, "Team boruak chawi nung turin hnehna chan hi kan mamawh takzet a ni. Thla thum zet inkhel lo leh hliam neih hnua chak hi inrintawkna min pe turin ka tan a pawimawh lehzual a, goal hnih ka khung thei hi ka lawm hle," a ti. 

Joao Felix hian nikum July thla khan Portuguese club ṭha Benfica aṭangin Atletico Madrid hi a zawm a, a man zat pawh pound maktaduai 113 zet a nih avangin a chungah beiseina a sang hle. 

Atletico a pan hma hian Benfica tan top flight football chu season khat chiah a la khel a, mahse inelna hrang hrangah match 43 khela goal 20 a khungsak nghal avangin European football-a club langsar ten an ngaihven. 

Spain lam panin Madrid khaw club-ah kum sarih atan contract a ziak a, sawiselna neuh neuh awm ṭhin mah se Osasuna lakah European football-a hmabak nei êng ber pawl a nihzia a pholang leh ta a, Diego Simeone tan chuan hmuh nuam a tling ang.

Felix hian tun season-ah Atletico tan inelna hrang hranga match 29 khelin goal riat a khung tawh a, season thara Champions League khelh an tumna kawngah player pawimawh a ni zel ang - Osasuna lakah hian minute 69-naah lakchhuah an ni a, coach Simeone-a'n fimkhur a mamawh tih a hai lo. 

Felix-a'n goal hnih a khung hian Atletico chu an chak dawn tih a hriatthiam theih tawh a, mahse an duhtawk phah lo. Minute 79-naah Llorente chuan a rawn khung ve leh a, 3-0 a ni. 

Minute 82-na a ni a, Morata hun a inherchhuak ve thung. Chelsea striker hlui hian an goal lina a rawn khung - a tirah offside vangin pawm a ni lo zet a, mahse referee-in video assistant referee a rawn hnuah a thutlukna sutin goal-ah a pawmsak. 

Real Madrid aṭanga a career ṭantu striker hian Premier League-a Blues tana a hun duhawm lo tak kha a theihnghilh ṭan niin a lang a, tun season inelna hrang hrangah match 34 khelin goal 13 a 

khung tawh. 

Hun tawp nan minute hnih chiah a awm tawh a, Atletico hian an lo la duhtawk lo cheu. Carrasco chuan an goal ngana a rawn khung ve leh a, an chak chiang hle - kum 26 mi winger hian February 2018 khan sum umin Chinese Super League club Dalian Yifang a zawm a, January khan loan-in Atletico-ah hian a kir - a kir leh hnua a goal hmasa ber a ni.