Man City lakah Arsenal an zawr
Premier League lo kir leh zanah Manchester City chuan an mikhual Arsenal 3-0 in an sawp a, khelmual chhunga player hmuhnawm leh thiam ber chu Kevin de Bruyne a ni a, a langsar leh sawi hlawh ber erawh David Luiz a ni thung!
Champion lai Man City chu Gunners tan an la thiam mah mah deuh. Pep Guardiola naute hian Nilaini zan Etihad Stadium-a inkhel hi kawng tinrengin an thunun a, mikhual team lam an nem bakah Luiz hnawhchhuah a nih avangin hnai takah City inkhel an en a ni ber.
Raheem Sterling-a’n (45’) hnai tak aṭangin a hlap lut a, midfielder De Bruyne-a’n (51’) penalty a chhuih luh bakah substitute Phil Foden (90’) chuan Sergio Aguero thawhrah sengin goal thumna a khung bawk.
Mangṭha Luiz?
Mikel Arteta-a’n a club hlui Manchester City hlauhawm zia a hrechiang a, goal venhim a tum. Defender pali Kieran Tierney, Shkodran Mustafi, Pablo Mari leh Hector Bellerin te hmaah Granit Xhaka leh Matteo Guendouzi te a dah.
Defensive midfielder Xhaka chu minute riatna lekah hliam vanga lak chhuah a ni a, minute 24-naah Spanish defender Mari chu lakchhuah a ngai leh bawk - thlak turin Dani Ceballos leh Luiz te an rawn lut thung.
Luiz-a’n box chhungah holam taka ball a dan sual dawngtu Sterling chuan chawlhlawk hma deuhin goal hmahruai a hlap lut. Second hlaf tir lamah Brazilian defender bawk hian Riyad Mahrez a ti tlu a, penalty a chawi bakah amah chu hnawhchhuah a ni bawk.
Kum 33 mi Luiz hian nikum khan season hnih atan Gunners a zawm, season khatna a hmang zo dawn, a contract neih danah season lehpek atan chuan inbiak ṭhat tur a ni - inbiakna an nei mek. City an hneh loh hnuah a tih sual a nih thu sawiin thupha chawi mah se fans lamin chelh an chak a rinawm loh.
City an thiam
Etihad Stadium-ah chuan Manchester City hi chak tura rinkai sa an ni a, rin an hlawh ang ngeiin inkhel pawh an thunun. De Bruyne, David Silva leh Ilkay Gundogan ten midfield an thunun - tlan tam tura dah Bukayo Saka leh Joe Willock te ruh a la no a, tih theih an nei lo.
De Bruyne, Sterling leh David Silva ten Arsenal keeper Bernd Leno tan hna hautak an siamsak fo. Belgium international KDB-a’n inkhel a khaikhawm hneh hle a, Mahrez leh Sterling tana ball duhthusam a pek erawh goal-ah an chantir thei lo thung.
Leroy Sane chu bench lamah dah a ni a, Germany international hi hliam vangin tun season-ah a la inlan lo. Covid-19 vanga league chawlh lailawk a nih vangin a dam hman a, chhuak tur angin thawm nei mah se an match lehpeka Burnley an mikhual hunah chuan a inlan a rinawm.
Guardiola-a’n Sane bakah a striker Aguero chu bench lamah a dah thei a, an chak dawn tih a chian hnuah defender pawimawh Aymeric Laporte leh De Bruyne te a dahṭha bawk, defender Eric Garcia erawh hliam vanga lak chhuah a ngai ve tho - EPL nomawi hloh dawn mah se Champions League an beisei sang ngam ang.
“ Inkhel tir lamah khan player zawng zawng khan ball chan an chak vek, hun rei tak hnua match nei leh chauh kan nih avangin thil mak a ni hran lo. Chawlhlawk hma a goal an khung thei kha a pawimawh em em a, a pumpuiah chuan
ka naute khelh danah ka lung a awi.
“ Eric Garcia kha a luah tihpalh a ni a, a tirah kha chuan a ngaihtuahawm hle. Hliam a tawhtirh kha chuan damdawi inah a awm a ngai ngei dawn tih chu rilruah a awm nghal, a hliam hi endik nawn leh a ni ang, chumi hnuah a dinhmun tak a hriat theih ang,”
- Pep Guardiola
Kum 19 mi Garcia-a’n Gunners lakah inkhel bul a ṭan a, hun tawp dawn lamah anmahni keeper Ederson nen ball kang lak an tumna lamah a inhliam. Khelmualah minute 11 chhung vel buaipui niin, oxygen pek a nih hnuah zawn chhuah a ni.
“A tir aṭang khan kan ke chheh a fuh lo nghal, tihsual leh siamṭhat ngai kan neih ang ang chu vawiinah hian thleng zo vek se ka duh hle. Xhaka leh Mari an inhliam nghal a, ruahman leh beisei loh dana thil a kal laklawh tawh chuan a harsa ṭhin.
“David Luiz pawhin a tihsual a pha lo, ngaihdam a dil ngei bawk. Thil thleng thei hrang hrang ka ngaihtuah hnuah David kha bul ṭantir lo ka ni, mahse loh theih lohna vangin a luh a ngai. A contract
chungchangah sawi tur thar a awm rih lo a, player puitling tak a nihna erawh a la
pangngai reng.”
- Mikel Arteta
Spanish manager hian Arsenal a enkawl tirh aṭanga a chhawr rim Mesut Ozil chu City khelmualah a hruai ve lo. Germany international a hruai loh chhan hi, ‘Inkhelh dan tur a ruahmanah a tel loh vang,’ tiin a sawi a, neuh neuh ngah tak Ozil a thlan loh chhan tak hi a sawi chiang lo.