Man United chakna academy player
Manchester United-in Nilaini zan Premier League inkhelah Brentford 3-1 in an hneh. Brentford Community Stadium-a Man United-in hnehna an chan theih nan David de Gea a pawimawh a, goal thum hi academy chhuak Anthony Elanga, Mason Greenwood leh Marcus Rashford-te khung a ni.
Ralf Rangnick-a hoten match 21 aṭangin point 35 an hmu a, pasarihnaah an awm mek. Man United hian January 22, Inrinni zan hian Old Trafford-ah West Ham an mikhual ang.
De Gea a langsar
Man United tan Cristiano Ronaldo-a'n bul a rawn ṭan a, player langsar erawh keeper De Gea a ni thung. Mikhual team hian bul ṭan chhelo mah se Brentford-in chance ṭha an ngah.
Bees midfielder Mathias Jensen-a'n ṭum hnih ngawt keeper De Gea chiah hmachhawn mah se Spanish keeper hian a kein a dansak ve ve.
Brentford defender Mads Bech Sorensen pawhin corner kick aṭanga a ball hmuh chu goal pawnah chiah a pet. Danish midfielder Christian Norgaard volley pawh kawh ṭha mah se crossbar chungah a kal. First half-ah goal a lut lo a, De Gea zarah Man United an him.
United thar
Second half-ah Man United goal bawh a na sawt a, Cristiano Ronaldo-a'n crossbar a tauh per. Minute 55-naah Elanga-a'n manager Rangnick-a'n a ring thlawn lo a nih tih lantir nan Fred hnen aṭanga a ball hmuh chu ṭha takin a khung.
Scott McTominay-a'n midfield a luah lum ṭha a, Scottish midfielder ball vawrh chu Ronaldo-a'n Bruno Fernandes tana um nuam tawkin a dah thlak sak. Portuguese midfielder hian ṭha taka lalutin amah pawttu Mason Greenwood a pe a, minute 62-naah Greenwood-a'n goal ruakah a khung.
Minute 77-naah McTominay-a'n Brentford attack tur dang chatin ṭha takin a la chhuak a, Fernandes hnenah ball pein Portuguese midfielder hian Marcus Rashford-a khung turin a siamsak.
Inkhel chawhnu lamah Man United an khel ṭha a, an khel ṭha tluan tling chuang lo. Minute 85-naah goal an chhuah leh tho a, corner kick aṭanga ball kal chu buai nuaih karah Ivan Toney-a'n a khung.
Ronaldo show
Cristiano Ronaldo-a'n goal khung lo mah se inkhelh banah a chanchinin sawi zui a hlawh a, tun ṭuma mi erawh a ṭha lo lam a ni. Portuguese forward hi minute 71-naah Harry Maguire-a'n a thlak a, a chetdan hmangin a lungawi lo tih a lantir.
German manager Ralf Rangnick chuan, "Ronaldo hnenah 2-0 in hma kan hruai tawh a, Villa lak kan tihsual aṭangin inzir kan mamawh thu ka hrilh. Aston Villa nena kan inhnehtawk ṭum khan tlarhnung defender panga ka hman loh avangin ka thutluknaah ka lungawi lo.
"Brentford nen hian tihsual nawn kan duh tawh lo. Ronaldo pawhin coach mit aṭangin a thlir a nih chuan a hriatthiam ang. Mimal ni loa team tana ṭha ber tura thutlukna ka siam," tiin Ronaldo a thlak chungchang a sawifiah.