Spurs Super Sub 'Bergwijn'

Premier League Nilaini zan inkhelah thilmak a thleng. Leicester City-in an mikhual Tottenham Hotspur lakah hun pekbelh minute linaah pawh 2-1 in hma an hruai a, amaherawhchu hun a tawp meuh chuan Antonio Conte hote 3-2 in an chak.

King Power Stadium-a inkhel hmuhnawm bikah Foxes tana Patson Daka goal hmahruai chu Spurs-in Harry Kane hmangin an sut a, mualneituin James Maddison goal hmanga hma hruai nawnin chakpui tawh turah an inngai. Hun pek belhah pawh minute nganaah substitute Steven Bergwijn-a'n siphurh a sut a, minute hnih hnuah Dutch forward hian chakna goal a khung.

Tottenham Hotspur-in Antonio Conte hnuaiah Premier League-ah hneh loh a la tawng lo a, match 19-ah point 36 hmuin panganaah an awm mek. Spurs hian pathumnaa awm Chelsea aiin match liin an khel tlem a, an khelh hmabakah an chak vek a nih chuan khelh zat inangah Blues chungah an awm thei a ni.

A hmuhnawm
Spurs-in nung takin inkhel bul an ṭan a, goal chance pawh an ngah nghal. England captain Harry Kane a ball bet chu goalline aṭangin Foxes defender Luke Thomas-a'n a dang hman. Goal hmaah Kane a vannei tawk lo a, hemi hnu hian crossbar a tauh per leh bawk.

Leicester City erawhin an chance ṭha neih hmasak ber goal-ah an chantir a, minute 24-naah Daka-a'n goal hmahruai a khung. Goal chhuah hnuah Spurs an hnual phah lo a, Kane-a'n Harry Winks aṭanga a ball hmuh chu la lutin Foxes defender Caglar Soyuncu a bum hnuah tawih zetin goal kilah a khung.

Second half-ah Foxes bawkin hma an hruai a, James Maddison leh substitute Harvey Barnes te an inthlawp ṭha a, England international Maddison-a'n minute 76-naah ṭha zetin a pet goal.

A hunah Bergwijn
Minute 90-naah Leicester chak nemnghehna hun an nei a, Barnes-a'n amah thlawptu pe loa goal-a pet tlang a thlan avangin Spurs an vannei. Injury time-ah minute nga pek belh a ni a, Pierre-Emile Hojbjerg vawrhluh chu Matt Doherty-a'n sut lutin hemi per hi Bergwijn-a'n chiang takin a pet goal.

Dutch forward-in goal a khung hian minute 94:51 a ni a, Spurs rilru put hmang a dik. Kane-a'n net chhunga ball chu a va la vat a, goal dang an la beisei. A tawpah Spurs an vannei tel a, coach Conte hnathawh a lang tel bawk.

Foxes midfielder Youri Tielemans ball pass chu Hojbjerg-a'n lo dangin Danish midfielder hian Kane a pe nghal a, Kane-a'n fing takin Bergwijn tan through ball ṭha bik a pe. Dutch forward Bergwijn hian keeper Kasper Schmeichel a bum hnuah goal ban perin a pet goal a, Spurs-in 2-1 in hnehna an chang.

King Power Stadium-a Spurs supporter-te awmna lamah Bergwijn-a'n goal khung a lawm a, an sapal tal a ni ber. Inkhelh banah pawh Kane leh coach Conte thlengin Spurs fan bulah an chak an lawm.

Hei le, Bergwijn
Kum 24 mi Steven Bergwijn hian January 2020 khan Tottenham hi a zawm a, minute 79-naa Sergio Reguilon a thlak hma hian London club tan Premier League-ah goal li chauh a la khung. Chu chauh a ni lo, tun season Premier League-ah goal a la khung lo.

Spurs-in Bergwijn hi chhuahtir an hreh lo a, Ajax pawhin lei tumin ṭum hnih London club hi pound maktaduai 12.5 bawr velin an dawr tawh. Amaherawhchu Daniel Levy leh a hoten PSV aṭanga pound maktaduai 26.7 senga an lakluh Bergwijn hi man man zawka hralh an duh avangin Ajax dilna hi an hnawl ve ve.

Bergwijn hian second 79 chhung lekah goal hnih a khung a, Ajax tan leichhuah a harsa leh sawt dawn. Spurs hi Wolves winger Adama Traore nen sawizawm an ni a, tunah erawh Spanish winger hi Leicester laka hero 'Bergwijn' nen an buk ṭhat leh a ṭul dawn a ni.

Conte-a thukhawchang
Spurs manager Antonio Conte chuan, "Kei chuan Bergwijn hi player pawimawh takah ka ngai a, striker position-a a khelh theih bakah number 10-ah pawh a khel thei a, player fing tak a ni a, player pakhat bum a harsat lo. A pawimawh ber chu an hlim a ngai a, Tottenham-a cham turin a hlimin ka hria," tiin a sawi a, Ajax tan thu hriat nuam a ni lo ang.

Italian manager Conte chuan sawi chhunzawmin, "Dik taka sawi chuan injury time-a 2-1 a nih kha chuan a lungawi thlak loh. Chutihrualin hun tawp thlengin ka player-te an tlawm duh lo a, theihtawp an chhuah. Siphurh kan sut pawh khan chak tumin ball kan la la a, khatiang rilru pu player kha ka duh a ni," tiin a sawi.

Tottenham hian January 23, Pathianni hian Stamford Bridge-ah Chelsea an hmachhawn dawn. Thomas Tuchel-a hote hian League Cup semifinal-ah Spurs hi hneh zo deuh chiah mah se tuna team pahnih boruak thlir chuan Blues aiin Antonio Conte hote buk a rit zawk hial ang.

January 19, Nilaini
Leicester City 2 - 3 Tottenham Hotspur
LEI : Patson Daka 24'; James Maddison 76'
TOT : Harry Kane 38'; Steven Bergwijn 90+5', 90+7'

Brentford 1 - 3 Manchester United
BRE : Ivan Toney 85'
MNU : Anthony Elanga 55'; Mason Greenwood 62';
Marcus Rashford 77'

Zanin Inkhel Tur
Watford 1:30 AM Norwich City