Remsiami telna India inlan dawn

Lalremsiami Hmar telna India hmeichhe hockey team chuan zanin dar 9:30 hian Women's Asia Cup 2022 a an match hmasa ber an khel dawn a, team ṭha Malaysia nen an inhmachawn ang.

India hian hliam damhlim Rani Rampal an la chhawr thei dawn lo, captain Rani a awm loh avangin tlarhma lamah Mizo nula Remsiami pawimawhna a sang zual dawn a, goal khung kawngah mawhphurhna a nei sang dawn.

Inelna hi a pawimawh dan a zual, nomawi inchuhna a nih bakah FIH Women's World Cup khel tur zawnna a ni nghal dawn. India tan hockey inelna lian leh ngaihhlut hmachhawn thei turin thlen san ngei a pawimawh.

India tana captain armband hreng tur goalkeeper Savita chuan, "Ruahmanna fel tak kan nei vek tawh, chumi tih hlawhtlin tum chuan theihtawp kan chhuah dawn, player tinin kan tih tur chin kan hre chiang tawh hle.

"Tun hnaiah Malaysia nen kan intawng fo a, team ṭha tak an ni tih pawh kan hria, chuvangin kan inven uluk pawh a ngawi dawn," tiin a sawi. Tokyo Olympic medal an lak phak loh chiah avangin hmasawn an ngaih thu a sawi bawk.

Champion lai India hi pool A-ah Malaysia, Japan leh Singapore te nen an awm khawm. Inelna neih hnuhnungah khan inkhel pawimawha Japan an hneh theih nan Remsiami'n goal pawimawh a lo khung tawh a ni.