Japan tlangval hneh loin Murray a tla

Tennis world number 1 hial pawh hun rei tak lo ni tawh, inelna lian Grand Slam nomawi pathum chawi tawh bawk Andy Murray chu Japan tlangval Taro Daniel hneh loin Australian Open 2022 second round aṭanga vuak tlak a ni.

Murray hi kum 34 mi a ni tawh a, a kum tam tawh lamah hliamin a tlak buak fo avangin ngai a awh thei tawh lo. A tan major title lak a harsa tawhin a rinawm, inkhelh chawlsan mai a la tum loh avangin beisei erawh a la nei ngam.

Nimin tlai inkhel dangah US Open champion Daniil Medvedev chuan Nick Kyrgios chu 7-6(1), 6-4, 4-6, 6-2 in a hneh. Tualchhung tlangval Kyrgios hian theihna a nei sang, mahse nungchang mawi lo vangin a thleng sang lo - Russian tlangval lakah pawh boruak ngam mah se inkhelhah a ngam lo.

Mangṭha Andy
A match hmasa berah Murray hian set nga a khel nghal a, harsa takin first round a paltlang a nih kha. Nimin khan John Cain Arena-ah inlan lehin a tir aṭangin a khel ṭha tawk lo, darkar hnih leh minute 48 an khelh hnuah 6-4, 6-4, 6-4 in a chak lo.

Britain tlangval hian a service vawi nga ngawt a hloh a, a hmachhawn hi player langsar lo ni mah se kawng tinrengah a phak lo. Qualifier aṭanga in vaw kai Daniel chuan, "Hetiang inelna liana player hmingthang hneh chu beisei phak bak a ni hial.

"Set hnih ka lak hnu pawh khan ka la hlauthawng reng. Mite chuan Murray ka hmachhawn dawn tih an hriat khan chak lo turah min ngai, mahse beisei ka neih tlat avangin a tawpah ka hlawhtling," tiin tennis a khelh hun chhunga a chakna ropui ber a tawn thu a sawi.

Murray hi a khel bawr hliam vangin a buai rei hle a, tun hnai kum thum chhung chu pangngai taka inkhelh a nei hleithei lo. Tennis chawlhsan tur anga ngaihna pawh a lian hman, mahse beidawng loin a la khel hram hram - French Open, Wimbledon leh US Open lamah pawh kan hmuh beisei ang.

Inkhel dang
Mipa singles champion thei tura rinkai zinga mi Stefanos Tsitsipas leh Andrey Rublev te pawhin hnehna an chang a, tun ṭumah hian Grand Slam champion thar nih tumin thapui an thawh - an khelh danah theihna an nei tih a lang.

Seeded palina Tsitsipas-a'n Argentine tlangval Sebastian Baez chu 7-6 (7-1), 6-7 (5-7), 6-3, 6-4 in a hneh, set li hi darkar thum leh minute 22 chhung an khel a, nipui khaw lum laia inkhel an nih avangin match tawp lamah an chau.

Russian tlangval, seeded pangana ni bawk Andrey Rublev erawhin harsatna a nei lo; a khingpui Ricardas Berankis chu 6-4, 6-2, 6-0 in a hneh a, inelna kal laiah set a la hloh lo. Norbert Gombos 6-2, 6-3, 3-6, 7-6 (8-6) a hnehtu Marin Cilic nen an inhmachhawn leh ang.

Nimin second round inkhel dangah tualchhung tlangval Alex de Minaur, Taylor Fritz leh Roberto Bautista Agut te pawhin an khingpui ṭheuh an hneh. Tukin dar 5:30 aṭang hian inelna an nei chhunzawm leh nghal a ni.

Inkhel Thlirna Tawi
Murray Stats Daniel
7 Aces 12
3 Double faults 2
67/108 1st serve in 57/98
44/67 Win 1st serve 45/57
16/41 Win 2nd serve 21/41
2/11 Break points won 5/10
22/34 Net points won 20/25
38 Winners 46
49 Unforced errors 21
92 Total points won 114