Inter Milan an chak hram

Hun tawp dawnah si phurh an sut a, extra time-ah chakna goal an khung leh hram bawk - Inter Milan chuan Coppa Italia quarterfinal lut turin vanneihna an mamawh tel, an mikhual Empoli chu 3-2 in an hneh hram.

Nilaini zan San Siro-a inkhelah Alexis Sanchez hmangin Inter lamin hma an hruai a, second half-ah Empoli lamin Nedim Bajrami hmanga an sut hnuah Ionut Radu chuan anmahni lamah a ti lut bawk, hun tawp dawn thlengin mikhual lamin 2-1 in hma an hruai.

Inter an vannei, minute 90+1-ah Andrea Ranocchia hmangin si phurh an sut hram a, extra time an khelh theih phah. Minute 104-naah Stefano Sensi chuan chakna goal a khung, a siamsaktu chu Sanchez a ni - Chile international hian Super Cup final-ah goal pawimawh a khung tawh bawk.

Inter Milan manager Simone Inzaghi chuan, "Empoli khan theihna sang tak an nei tih kan hria, a nihna takah chuan min chhaih buai khawp mai. Goal kan chhuah kha chu a pawi, chutihrualin huaisen taka kan beih letna kha a lawmawm.

"Player an khel ṭha hlawm em em vek, a bik takin tun hnaia Sanchez khelh danin min tilawm. Match hnuhnung paruk zinga paliah bul a ṭan thei a, a dang pahnihah bench aṭangin a lut bawk, goal a khung bakah midang tan a ṭangkai," tiin Sanchez a fak hle.

Inkhel dangah Sassuolo chuan Cagliari 1-0 in an hneh a, goal awmchhun hi Addou Harroui-a'n minute 18-naah a khung a ni a, a vawi khat nan Coppa Italia quarterfinal an lut - an match lehpekah chuan Juventus an hmachhawn ang.