Copa del Rey aṭangin Atletico an tla

La Liga champion Atletico Madrid tan season a fuh thei lo - Copa del Rey last 16-ah Real Sociedad chuan 2-0 in an hneh a, champion nomawi pakhat chu an mangṭha leh ta phawt.

Real Sociedad tan Adnan Januzaj leh Alexander Sorloth ten goal khat ve ve an khung a, Atletico Madrid-in a chhanletna tur an neih loh avangin an tlawm.

La Liga lamah pawh Atletico hi palina an ni mek a, hmahruaitu Real Madrid aia match khata khel tlemin point 16 ngawtin an phak lo mek a, nomawi humhim ai chuan season thara Champions League khelh leh khelh loh chu an buaina a ni tawh!

Copa del Rey aṭangin petchhuah an ni leh ta a, Champions League last 16-a Manchester United hmachhawn tur tan nomawi chawi miah loa season khar theihna chance a sang hle.

Januzaj kha...

Manchester United rawlthar duhawm ṭhin Adnan Januzaj-a'n khaw­vel huapin hriat a hlawh hman a, English media chaw tui ber a ni ṭhin - United-ah beisei a phak loh hnuin Spanish football-ah a hming a chher.

Nilaini zanah pawh Januzaj-a'n theihnghilh a la duh lo tih pholangin Real Sociedad tan goal a khung ve leh ta a, minute 33-naa a goal khung hi goal class bik a ni.

Belgian midfielder hian defender pathum ven karah ball a tauh a, goal chung kil sira mawi zeta a tauh luh chu Slovenian keeper ṭha mi Jan Oblak tan meuh pawh dan theih a ni lo.

Januzaj hian tun season inelna hrang hrangah match 29 khelin goal li a khungna a ni a, assist vawi thum a nei tawh bawk - Sociedad tan player ṭangkai a ni.

A la tawk lo

Goal an chhuah hnuah Atletico an insiamṭha lo a, chawlhlawka Diego Simeone fuihna meuh pawhin Madrid khaw club hi a tiharh zo lo - second half ṭan aṭanga minute hnihna lekah Sociedad bawkin an khung.

Atletico centre back Felipe a chesual a, Sociedad forward ṭha mi Mikel Oyarzabal-a'n Brazilian defender hi ball chhuhsakin Alexander Sørloth tan a siamsak a, Norwegian striker hian Oyarzabal-a duhsakna chu goal-ah a lo chantir.

Simeone-a'n goal khung beiseiin Brazilian forward Matheus Cunha leh Aston Villa nena sawizawm Luis Suarez te a luhtir a, mahse, South American forward pahnih hian goal an keng tel lo.

Atletico tan Joao Felix leh Yannick Carrasco ten woodwork an tih per ve ve a, Atletico-in inkhel an thlirlet chuan ui takin an chance duhawm hlahte an thlirlet ang.

Tawpna a ni lo

Atletico-in Copa del Rey an mangṭha a, kar hmasa lawk khan Saudi Arabia-ah Spanish Super Cup semifinal khelin an chak lo bawk - La Liga-a an dinhmun sawi nawn a ngai lo.

Mahse, Atletico defender Mario Hermoso chuan an tan tawpna tur a la nih loh thu a sawi a, kum 26 mi defender chuan, "Atletico kan ni a, ngai kan awh leh theihna turin kan theihna zawng zawng kan hlan ang.

"Kan lo kir leh ang. Theihtawp kan chhuah leh dawn - kan dinhmun a duhawm lo tih kan hria a, mahse, kan tho leh dawn tih hi ka chiang em em a ni," tiin thawh leh ngei a tum ruh hle.

Atletico player-te chuanna bus chu inkhelh hmain Real Sociedad fan-ten an bei a, a si per dawngtu Atletico fan pakhat a inhliam niin an sawi. He thu buatsaih a nih lai hian Spanish FA lamin engtiang takin nge hma an lak dawn tih a la hriat loh.