Raducanu leh Muguruza an tla

Australian Open 2022 khelh laia hmeichhe player hmuhnawm Emma Raducanu leh Garbine Muguruza te an tla. Player ṭha pahnih hi thleng sang tura beisei ni mah se second round paltlang zo loin nimin khan an zinkawng a tawp.

Nimin Margaret Court Arena-a inkhelah, US Open champion lai Raducanu hian darkar hnih leh minute 38 chhungin Danka Kovinic chu 4-6, 6-4, 3-6 in a ngam lo. Kovi­nic hian tennis a khelh hun chhunga a vawi khat nan Grand Slam-ah third round a lut.

Kum 27 mi Kovinic chuan, "Emma hmachhawn theih hi a lawmawm, a chhan chu ani hi chu khawvel ngaihven a ni. Third round han luh ve chu a ropui ka ti a, ka duhthusam hi tunah tawp mai loin sang zel se ka ti," tiin a sawi.

British tleirawl Raducanu-i'n season hmasa khan khawvel brakhaihin US Open nomawi a chawi, kum 19 mi lakah beiseina sang viau mah se Australian Open-ah erawh beisei a phak lo, a match hmasa zawka hnehna chang tur pawhin set thum a mamawh.

Muguruza a tla
Australian Open 2022 khelh laia beisei loh result kan hmuh lian hmasa chu Garbine Muguruza tla kha a ni. Seeded pathumna hi Alize Cornet hneh loin second round-ah a zinkawng a tawp a ni.

Rod Laver Arena-a inkhelah Muguruza hian beisei a phak lo, unforced errors vawi 33 ngawt a nei a, break point vawi khat pawh a hmu lo - a khingpui Kontaveit a chhaih buai phak lo hle tihna a ni, chak phu khawpin a khel chhuak lo.

Spanish nula Muguruza chuan, "Ka khelh danah ka lawm lo, training-na hmuna ka ball vuak angin ka vaw thei tlat lo," tiin a chak loh chhan a sawi. A hneh loh Cornet hi world number 59 ni lai a ni a, seeded zingah pawh a tel phak lo a ni.

Inkhel dang
World number 2 Aryna Sabalenka chuan Chinese nula Xinyu Wang chu 1-6, 6-4, 6-2 in a hneh a, set hma­sa berah che ṭha lo mah se a hnu­hnungah a chungnung zawk ve ve avangin third round a in vaw kai.

Kum 23 mi Sabalenka hi champion tura rinkai zinga mi a ni a, a match lehpekah chuan seeded 31-na Marketa Vondrousova a hmachhawn leh ang - tennis a khelh hun chhunga nomawi lian ber chawi tumin beisei a nei mek.

Champion lai Naomi Osaka a kaltluang hle. Japanese nula hian Madison Brengle chu 6-0, 6-4 in a hneh a, a match hmasa zawkah pawh straight set hmangin hnehna a lo chang tawh bawk, a chesual viau a nih loh chuan nomawi humhim thei tura rin a ni.