Barca-in Dembele hralhah an vau!

La Liga club Barcelona boss Xavi chuan, Ousmane Dembele chuan contract thar a ziak lo a nih chuan an kaltir mai a ṭul tur thu a sawi a, player inhliam ngun tak Dembele tan thutlukna siam vat a ṭul ang.

Xavi chuan, "Dembele hian contract thar a ziak lo a nih chuan a chhuah a ngai a, duhthlan tur dang a awm lo. Tunah hian kan dinhmun a buaithlak hle a, Ousmane bulah pawh kan dinna chiang takin kan sawi tawh," a ti.

Dembele hian kum 2017 khan Borussia Dortmund aṭangin Barcelona hi a zawm a, a man hi pound maktaduai 135.5 thlenga sang chho thei tura tih a ni a, mah se, hliam vangin beisei a phak lo.

Barcelona director of football Mateu Alemany sawi danin Barca hian July thla aṭang khan Dembele leh a agent te chu contract thar chungchang an sawipui tawh a, Catalan club-in contract thar an zawrhah hian a hlawh tihhniam a nih avangin Dembele hian a pawm duh lo niin a lang.

Alemany chuan, "Barca-a cham a duh lo tih a chiang a, hei vang hian a agent nen rang taka Nou Camp chhuahsan turin hrilh an ni tawh. Kan hmachhawpa rilru pe thei player kan duh a, January 31 hmaa transfer tih fel kan duh bawk," a ti!

Kum 24 mi Dembele hi Liverpool, Manchester United leh Newcastle United ten lakluh an duh nia sawi a ni a, French forward hma hun a chiang lo rih hle.

Xavi chuan, "Cham a duh a, mahse, kan inrem tlat lo. Hei vang hian club angin thutlukna kan siam a ṭul a, contract a pawm lo a nih chuan a chhuah a ṭul. Ka enkawlna hnuaiah a dam phawt chuan a khel ziah a, tun kan thleng hi thil nuam a ni lo," a ti.

Barca tan match 129-a goal 31 khungtu forward hian nipuiah a contract a hmang zo tawh dawn a, Catalan club hian a thlawna chhuahtir ai chuan man neia hralh an duh a ni ber.