Salah telna Egypt an tlang; hmahruaitu Nigeria

AFCON-a an match hmasa berah Nigeria ngam lo mah se Egypt-in an match hnuhnung pahnihah hnehna an chang a, vawi sarih champion tawh team hian last 16 an lut fel der.

Mohamed Salah telna Egypt hian Sudan chu 1-0 in an hneh a, inkhela goal awmchhun hi Mohamed Abdelmonem khung a ni - Salah langsar mah se goal erawh a khung lo.

Group D inkhel dangah Nigeria chuan 2-0 in Guinea-Bissau an hneh a, match thum an khelhah hnehna chang vek chungin a thiam 16 zingah an tel chiang hle.

Super Eagles tan Spanish club UD Almería forward Umar Sadiq leh captain William Troost-Ekong te chuan goal khat ve ve an khung a, Guinea-Bissau-in a chhanletna tur an nei lo.

A awlsam

Sudan lakah Egypt-in hna hautak thawh tur an nei lo a, goal khat chiah khung mah se inkhel an thunun hneh hle - minute 35-naah corner an hmu a, Abdallah El Said-a pet chu Abdelmonem chuan lo tauh lutin goal-ah a chantir.

Egypt club Future defender Abdel­monem hi kum 22 mi chauh a ni a, Sudan laka a goal khung hi ram tana a goal hmasa ber a ni - AFCON last 16 luh nan an hman bawk avangin a ngaihlu khawp ang.

Carlos Queiroz enkawl Egypt tan forward Mostafa Mohamed chuan goal khungna remchang a nei bawk a, mahse, a vanneih zan a ni lo.

Kum 1970-a AFCON nomawi lo chawi tawh Sudan-in kum 2012 hnua an major tournament hmasa berah hian goal khat chiah an khung a, point khat chiah an hmu a, table-a pathumna ni chungin inelna an mangṭha.

Khawiah nge Salah?

Liverpool striker chhuanvawr Salah-a'n Guinea Bissau lakah goal a khung tih loh chu goal khung a nei leh tawh rih lo a, mahse, Egyptian King hming lem an pek forward hi a khel chhia tihna a ni lo.

Sudan lakah pawh Salah hian goal khungna remchang a nei a, mahse, second half-ah a hun neih duhawm chu Sudan keeper Ali Abu Eshrein chuan ṭha zetin a dansak a, Salah hming ṭha tur a beng dai.

He inkhelah hian Sudan keeper Mohamed Mustafa chu first half-ah che ṭha viau mah se a inhliam a, bench aṭangin second choice Eshrein hi a lut - Salah goal khung tur a dang a, a hna a tlin hle.

Salah hian a ṭhianpa Amr el Solia tan goal khungna remchang a siamsak bawk a, mahse, Egyptian club Al Ahly tana khel midfielder hian a ṭhianpa duhsakna hi goal-ah a chantir thei tlat lo.

Hei le Nigeria

Nigeria-in Guinea-Bissau an hma­chhawn hmain last 16 an lut chiang tawh a, inelna ṭan hma thla khat leka coach Gernot Rohr thlaktu Augustine Eguavoen chuan player pariat ngawt a thlak danglam.

Guinea-Bissau hmachhawntu aṭangin striker Kelechi Iheanacho, Troost-Ekong leh Wilfred Ndidi te chu bul ṭan nawn awmchhun an ni a, Nigeria-in goal khung tura an nghah deuh ngai mah se an talbuai phah lo.

Minute 56-naah Leicester forward Iheanacho chuan Sadiq tan duhthusama ṭhain a siamsak a, Almeria forward tan goal-a chantir loh chi a ni lo a, kum 24 mi striker hian ram tana match thum a khelhnaa a goal hmasa ber a khung.

Guinea-Bissau hian Fali Cande-a freekick hmangin chance duhawm an nei ve zui a, target zawna kal freekick hian Nigeria captain Troost-Ekong ban fuh mah se video assistant referee (VAR) a inrawlh tlat lo.

A la tawk lo

Last 16 lut chiang tawh an nih avangin Nigeria an inthlahdah duh lo a, minute 75-naah Troost-Ekong chuan Super Eagles goal hnihna a khung - an thlawk sang zel.

Ligue 1 club Nantes forward Moses Simon chuan ṭha zeta Guinea-Bissau defender a tlan pel hnuah a shot a, goal bar pera a lo let lehlam chu Watford defender Troost-Ekong hian goal-ah a lo chantir.

Kenyan referee Peter Waweru chuan Troost-Ekong hi a offside-ah ngaiin goal-ah a pawm lo zet a, mahse, VAR a inrawlh hnuah goal-ah pawm a ni ta thung - an goal chance-a VAR a inrawlh loh hnua an lama goal-a VAR inrawlh leh si hi Guinea-Bissau tan chuan a ngeiawm ang.

Guinea-Bissau tan winger Jorginho chuan chawlhlawk hmain a goal chance duhawm a hlah a, Leonel Ucha Alves-a khung ngei tura lang Nigeria goalkeeper Francis Uzoho-a'n a lo dansak pawh uiawm tak a ni - chak se last 16 luh beiseina la nei tur team hian point khat nen AFCON an mangṭha.

January 19, Ningani Zan
Guinea-Bissau 0 - 2 Nigeria
NIG: Umar Sadiq 56'; William Troost-Ekong 75'
Egypt 1 - 0 Sudan
EGY: Mohamed Abdelmonem 35'
*Nizan khan group stage khelh zawh a ni a, result kan hre hman lo. Pathianni zanah last 16 khelh ṭan a ni leh ang.
Team Dinhmun
Group A
# Team Pld W D L GF GA GD Pts
1 Cameroon 3 2 1 0 7 3 4 7
2 Burkina Faso 3 1 1 1 3 3 0 4
3 Cape Verde 3 1 1 1 2 2 0 4
4 Ethiopia 3 0 1 2 2 6 -4 1

Group B
# Team Pld W D L GF GA GD Pts
1 Senegal 3 1 2 0 1 0 1 5
2 Guinea 3 1 1 1 2 2 0 4
3 Malawi 3 1 1 1 2 2 0 4
4 Zimbabwe 3 1 0 2 3 4 -1 3

Group C
# Team Pld W D L GF GA GD Pts
1 Morocco 3 2 1 0 5 2 3 7
2 Gabon 3 1 2 0 4 3 1 5
3 Comoros 3 1 0 2 3 5 -2 3
4 Ghana 3 0 1 2 3 5 -2 1

Group D
# Team Pld W D L GF GA GD Pts
1 Nigeria 3 3 0 0 6 1 5 9
2 Egypt 3 2 0 1 2 1 1 6
3 Sudan 3 0 1 2 1 4 -3 1
4 Guinea-Bissau 3 0 1 2 0 3 -3 1

Group E
# Team Pld W D L GF GA GD Pts
1 Ivory Coast 2 1 1 0 3 2 1 4
2 Equatorial Guinea 2 1 0 1 1 1 0 3
3 Sierra Leone 2 0 2 0 2 2 0 2
4 Algeria 2 0 1 1 0 1 -1 1

Group F
# Team Pld W D L GF GA GD Pts
1 Gambia 2 1 1 0 2 1 1 4
1 Mali 2 1 1 0 2 1 1 4
3 Tunisia 2 1 0 1 4 1 3 3
4 Mauritania 2 0 0 2 0 5 -5 0

• Group tin aṭangin team pahnihin last 16 an lut ang a, pathumna zinga ti ṭha paliten knockout stage an lut bawk ang.