Hma lam panin Sindhu a kal zel

Syed Modi Interna­tional badminton tournament khelh laiah PV Sindhu a che fuh zel. Indian nula chhuanvawr hian nimin khan Lauren Lam chu straight game hmanga hnehin quarter­final a in vaw kai.

Olympic medal vawi hnih la tawh Sindhu-i'n hnehna chang turin hun a mamawh tam lo, minute 33 chhung lekin American nula hi 21-16, 21-13 in a hneh; quarterfinal-ah chuan Supanida Katethong a hmachhawn leh ang.

Sindhu hian a match hmasa zawkah amah ang bawka Indian player Tanya Hemanth chu 21-9, 21-9 in a lo hneh tawh a, match hnih a khelh tawh chinah game a la hloh miah lo - nomawi chawi beiseina a la nei sang hle.

Nimin hmeichhe singles inkhel dangah India nula Samiya Imad Farooqui pawhin Kanika Kanwal chu 21-6, 21-15 a hnehin a thiam pariat zingah a inhlangkai. Anupama Upadhyaya pawhin Smit Toshniwal 21-12, 21-19 in a hneh ve bawk.