Goalline technology-in Sheffield point ruksak

Football-in tunlai thiamna a hman zinga fak hlawh ber goalline technology pawh a dik famkim lo a, a tuartu chu Sheffield United an ni. Nilaini zan Premier League inkhelah Aston Villa leh Sheffield United te goal awm loin an inhnehtawk a, Blades midfielder Oliver Norwood freekick-in goalline pel mah se pawm a ni lo.

Sheffield hian point 44 hmuin parukna dinhmun an luah a, chak se chuan Manchester United chungah awmin panganaah an awm ang. Chris Wilder-a hote hian Champions League beiseina a la nei a, GLT tihsual pakhat avang hian point chauh ni loin sum leh a kaihhnawih ṭhahnem tak an hloh thei tihna a ni.

Sheffield United-in Europe an thlir laiin Villa-in Premier League-a inhamtan dan an zawng a, team pahnih tan inkhel a pawimawh ve ve.

Minute 41-naah Oliver Norwood-a freekick pet chu Villa keeper Orjan Nyland-a'n goal-ah a pu lut a, a fiahna tur ber 'sana' ah goal signal a awm loh avangin referee Michael Oliver-a'n goal-ah  a pawm lo.

Villa pawhin goal khungna hun ṭha an nei a, captain Jack Grealish 'through ball' ṭha zet chu Anwar El Ghazi-a'n hmun hlauhawmah cross-in kum 22 mi Keinan Davis-a'n a tlawh hman lo. Grealish bawkin fing takin McGinn-a tan a siamsak a, Villa midfielder pet hi Blades keeper Dean Henderson-a'n a dansak.

Sheffield United tlarhnung a phui ṭha a, tun season-ah goal 25 chauh chhuahin anmahni aia goal chhuah tlem chu Liverpool chauh an ni a. Goal venhim kawngah hian Manchester United aṭanga loan hmanga hawh Henderson a ṭangkai a, tun season-ah vawi 11 clean sheet a nei tawh.

Covid-19 vanga ni 100 chhung inkhelh tawh loh hnuah Premier League inkhel hmuh tur a awm a, Bundesliga leh La Liga lamah sawi hat tur a awm loh laiin England-a football inelna sang berah erawh GLT leh VAR an sawi zui nasa hle.

Nikum November thla khan Sheffield leh Tottenham an inkhel a, hemi ṭum hian Sheffield an vanduai tawh bawk. Tottenham nena an inkhelh ṭum hian Blades-in David McGoldrick hmangin goal an khung a, amaherawhchu goal an khung hma hian John Lundstram-a ke zungpui offside vangin an pawmsak lo. 

Sheffield manager Chris Wilder chuan, "Tunlai thiamna hman nasat berna league-ah camera pasarih hman a ni a, kil tin aṭangin a la chung­in a hmu fuh lo. Nikum khan Tottenham kan tlawh a, John Lundstram-a ke zungpui offside vangin kan goal khung min pawmsak lo. 

"Thuthlukna dik nghak turin ruahsur hnuaiah minute 10 kan ding. Birmingham-ah (Aston Villa awmna khua) minute 10 kan nghak thei lo hi ka hrethiam lo," tiin thutlukna pawm a harsat thu a sawi.