US Open khelh châk tawh Serena

Serena Williams chuan US Open khelh a châk tawh thu a sawi a, an rama tennis inelna lian ber hi player hrang hrangin sawisel mek mah se ani chuan entu awm lo pawha inkhelh a hreh lo.

August 31 aṭangin New York khawpuiah US Open hi khelh a ni dawn, coronavirus vangin US hi buai mek mah se inkaihhruaina dan khirh tak hnuaiah Grand Slam neih ngei an tum.

Kum 38 mi Serena chuan, “US Open 2020 khel tura New York khawpui pan ka châk tawh takzet, hun khirhkhan tak karah pawh thuneitu lamin ruahmanna fel tak nen an kaltlang pui thei tur hi ka lawm,” a ti.

American star Serena hian major title 23 a la tawh a, Open Era china record nei ṭha ber Margaret Court (24 titles) nihrual turin vawi khat champion chiah a ngai tawh - an ramah hian hun duhawm chan theih a inbeisei mek.

Covid-19 vangin March thla aṭang khan khawvel pumah tennis inelna chu tih tawp lailawk a ni a, Indopui pahnihna hnua a vawi khat nan Wimbledon pawh ṭhulh a ni. July thla chawhnu lam hian tournament ṭhenkhat chu khelh theih an beisei.