Coleman an hrem lailawk

Mipa 100m intlansiaka world champion ni lai Christian Coleman chu endikna neih turah a vawi thum nan a inlan loh avangin hrem lailawk a ni a, hrem a nihna hi kaltlang pui a nih chuan kum hnih chhung intlansiak thei lo tura tih a ni ang.

World Athletic anti-doping hnuaia awm Athle­tics Integrity Unit (AIU) chuan, “Eng inelna mah hmachhawn thei lo tura hrem lailawk a ni,” an ti. Hrem a nih hun chhung chu tarlan chian a la ni lo, kum 2018 leh 2019 khan endik a nihna turah a inlan lo tihna a ni.

Nikum khan Doha-ah World Championship neih a ni a, American tlangval hian 100m chu 9.76 chhunga thlengin pakhatna a ni. Mahse 2019 December 9 khan damdawi hman phal loh a hmang em tih enfiah tur a ni a, he hunah hian a inlan lo.

Kum 24 mi Coleman chuan, “Intih chakna leh takasa tana ṭha lo damdawi ka ei ngai lo a, ka ei ngai bawk hek lo ang. Engmah thup ka nei lo, endik ka nih theih nan hun hi ka pe tam tawk a, endik pawh ka tawk hnem tawh.

“Infiammite hi duh hun hun a endik thut thut theih reng kan ni, chutih rualin endiktu lam hian an mahni duh hun hunah rinhlelh thil thu ni awm taka an ko fo hi chu a dik bik lo. Kan kalphung hi siamṭhat ngai lai chu a awm ve bawk,” a ti.