Sanga record ropui

Chhinga Veng FC hi season ṭan hmaa khelh ṭhin MFA Super Cup leh I Day Football an champion nawn thei a, treble champion ni leh turin Mizoram Premier League chiah an hmabakah a awm ta.

An coach Lalsangzuala Hmar hian Chhingcows a zawm hmain Chanmari FC chu MPL-ah a champion pui avangin nomawi lian pathumah hian vawi hnih ṭheuh a zawnin a champion vek tihna a ni.

Sanga hi nomawi chawi kawngah a record a ṭha a, a enkawlna hnuaia Chhinga Veng record hian belhchian a dawl hle. Chhingcows hian Sanga hnuaiah match 40 khel tawhin vawi 35 an chak a, vawi li inhnehtawkin vawi khat chiah an chak lo.

Season liam ta khan match 24 an chak a, vawi li inhnehtawkin vawi khat an chak lo. Chhingcows hian goal 105 an khung a, goal 28 chauh an chhuah. Match 22 chhung hneh loh nei loin an kaltluang bawk.

Tun season-ah Sanga hote hian match 11 an khel tawh a, goal 15 khung tawhin an la chak vek a, goal hnih chiah an la chhuah. Season liam ta tawp lama an result nen belhkhawmin match 17 chhung hneh loh nei loin an kaltluang mek a, Chhinga Veng leh Sanga record hi a ropui hle.